Keşe «Artem» sauda ortalyǧynda Astana qalasy äkımdıgınıŋ ūiymdastyruymen «Käsıpkerlerge keŋes beru» aşyq esık künı öttı.
Bazardyŋ maŋaiy – būqara halyqpen bailanystyŋ töte joly. Öitkenı näpaqasyn sauda-sattyqpen aiyryp otyrǧan şaǧyn käsıpker de, qarapaiym qūqyǧy men memlekettık qoldau şaralarynan beihabar qatardaǧy jūmysşy men qarapaiym halyq osy töŋırekte. «Ruhani jaŋǧyru» baǧdarlamasynyŋ aiasynda, sonymen qatar, elordadaǧy biznes-ahualdy jaqsartu, şaǧyn jäne orta biznes ielerıne memlekettık qyzmettıŋ qoljetımdılıgın nasihattau maqsatynda ötkızılgen atalmyş şaraǧa bırqatar mekemeler men käsıporyndardyŋ ökılderı qatysty. Atap aitqanda, sauda üiınıŋ bırınşı qabatyndaǧy arnauly alaŋda Astana qalasy Tötenşe jaǧdailar, Qoǧamdyq densaulyq saqtau jäne Memlekettık kırıs departamentterı, Jūmyspen qamtu ortalyǧy, «Damu» käsıpkerlıktı qoldau qory, «Atameken» ūlttyq käsıpkerler palatasy, Äleumettık saqtandyru jönındegı memlekettık qor, Memlekettık bıryŋǧai zeinetaqy jinaqtauşy qory, «Käsıpkerlık eŋbekkerlerınıŋ käsıpodaǧy» qoǧamdyq ūiymy, «Astana – adaldyq alaŋy» jobalyq ofisınıŋ ökılderı ärı-berı ötkınşı jūrtqa salyq zaŋnamasy, biznestı qoldau şaralary, äleumettık saqtandyru, zeinetaqy jinaqtau jäne memlekettık qyzmetterdı onlain alu turaly san-salaly sūraqtarǧa jauap berıp, jan-jaqty maǧlūmat berdı.
Ädılbek JAPAQ
