Nūr-Sūltan qalasynyŋ äkımdıgı jarty jyldan berı basynan dau-damai arylmai kele jatqan tūrǧyn üi keşenınıŋ qūrylysyna bergen kelısımdı kerı qaitaryp aldy.
Atyşuly üi elordanyŋ sol jaǧalauynda Syǧanaq köşesı men Qabanbai daŋǧylynyŋ qiylysynda boi kötergen. Al audan halqy ol tūsta kezektı köpqabatty tūrǧyn üi keşenınıŋ tūrǧanyn emes, Balalar saraiynyŋ nemese mekteptıŋ, äitpese adamdar demalatyn saiabaqtyŋ qanat jaiǧanyn qalaidy. Öitkenı būl öŋırde halyq tyǧyz ornalasqan, zäulım üiler köp, bıraq tūrǧyndarǧa qyzmet körsetetın äleumettık nysandar jetıspeidı. Oramda tek bır ǧana orta mektep bar, ondaǧy oquşylar sany şamadan äldeqaida asyp ketken.
Ras, jazda tūrǧyn üi keşenınıŋ alǧaşqy qazyǧy qaǧyla bastaǧanda Esıl audany äkımınıŋ orynbasary Änuar Qaiyrjanov tūrǧyn üi keşenımen bırge mektep te salynatynyn aitqan. Ony qūrylys saluşy kompaniia BI Group ta rastady. Al Säulet, qala qūrylysy jäne jer qatynastary basqarmasynda tūrǧyn üi keşenınıŋ qūrylysy 17 şılde künı bekıtılıp ketkenın aitty. Ondaǧylar da jobada mekteptıŋ qarastyrylǧanyn jetkızdı. Sondai-aq jobanyŋ tūjyrymdamasy qala qūrylysy keŋesınde maqūldanǧan. Joba syzbasy üidıŋ naqtylanǧan josparyna jäne barlyq qūrylys normalaryna sai jasalǧan» deidı basqarmadaǧylar. Onyŋ üstıne būl üidı salar aldynda äkımdık audan tūrǧyndarymen üş ret kezdesu ötkızgen.
Alaida atalǧan qūrylysqa qarsy bastamaşyl toptyŋ belsendısı Oljas Bılälovtyŋ aituynşa, Nūr-Sūltan qalasynyŋ bas jospary boiynşa qalanyŋ 50 paiyz aumaǧy jasyl aimaqpen qamtyluy tiıs. Al dauly üi bas josparda körsetılgen naq osy «jasyl uchaskege» tüsıptı. «Mektep salamyz degenderı – halyqtyŋ narazylyǧyn basudyŋ ailasy. BI Group kompaniiasy tūrǧyn üi keşenımen bırge bılım oşaǧyn salamyz dese, tūrǧyndar qarsy bolmaidy dep oilasa kerek» deidı ol.
Bıraq būl ıstıŋ arty nasyrǧa şapty. Audan halqy qol jinap, ärtürlı instansiialarǧa şaǧymdandy. Tıptı QR Parlamentı Mäjılısınıŋ deputattary Premer-ministr Asqar Maminnıŋ atyna saual joldaǧan. Osyǧan bailanysty qala äkımdıgı atalǧan tūrǧyn üi keşenınıŋ qala qūrylysy zaŋdylyǧyna qaişy keletın-kelmeitındıgın tekserdı. Tekserıs nätijesı boiynşa üi qūrylysynan kemşılıkterdıŋ anyqtaluyna bailanysty qūrylys jürgızuge rūqsat berılgen qūjattar – säulet-jobalau tapsyrysy men syzba jobasynyŋ kelısımı kerı qaitaryp alyndy. Sondai-aq anyqtalǧan kemşılıkterdı joiudyŋ jospary jasaldy. Endı elorda äkımdıgı tūrǧyn üi keşennıŋ salynyp qoiǧan qūrylysyn eskere otyryp, qala qūrylysy qūjatyna tiısınşe özgertuler engızbekşı. Sondai-aq qūrylysty jalǧastyrǧanda mındettı türde qoǧamnyŋ sūranysy eskerıletın bolady.
Bır aita ketetın jait, qoldanystaǧy zaŋ boiynşa oblystardyŋ jäne Nūr-Sūltan, Almaty, Şymkent qalalarynyŋ äkımderıne özderıne qarasty öŋırlerde özdıgınen qūrylys jūmystaryn josparlauǧa rūqsat etılgen. Bıraq qazırgı kezde memlekettık qala salu ekspertizasy institutyn engızu, sondai-aq jobany müddelı memlekettık organdarmen jäne «Atameken» ŪKP-men kelısu mäselesı qyzu talqylanyp jatyr.
Būl endı aldaǧy künnıŋ enşısınde. Eger mūndai institut qoldanysqa ense, onda sapasyz äzırlengen jäne qoǧammen kelısılmegen qala qūrylysy qūjattary bekıtılıp ketpegen bolar edı.
