Mıne, bügın elordaǧa kelgenıme üş kün boldy. Arman quyp kelgen Astana – elımızdıŋ jüregı, halqymyzdyŋ armany. Aqtau – oblys ortalyǧy bolsa da, būl jerde özımızdı qalalyqtan görı auyl balasyna ūqsatatyn siiaqtymyz.
Al, Astana şe? Onyŋ jönı, ärine, bır bölek. Aqtaudan jolǧa şyǧarda, iaǧni, tuǧan üiden, anamnan, bauyrlarymnan, ata-äjemnen alystarda menı bır qimastyq sezım baurap alǧany ras. Jüregım eljırep, bauyrlaryma bır, ata-äjeme ekı qarap, ana bölmeden myna bölmege kırıp, bır närsesın joǧaltqan nemese ūmyt qaldyrǧan adamdai küi keştım de qaldym. Degenmen, jüregımde bır alyp ūşqan, örekpıgen sezım de boldy. Qysqy kanikulǧa kelgen kezımdı özımdı Astanada oqityn student retınde elestetıp, armanymnyŋ baǧytyn aiqyndaǧandai boldym. Ata-äjem de ädettegıden köbırek erkeletetındei, anam «ata balasy» dep onşa köp söilemese de, qimaityndyǧyn közımen ūqtyrǧysy keletındei. Sol sezımmen özımnıŋ es bılgelı bauyr basqan mūnaily ölkeme qimastyqpen qol būlǧap bara jatsam da, «endı Aqtau men Astana arasyn jaqyndata tüsemın» degen oi menı jūbatqandai edı.
Mıne, sol armandaǧan Astanaǧa kelgenıme üş kün, üş tün toldy. Poiyzdyŋ vokzalǧa jaqyndai bastaǧan sätınen bastap jüregım örekpıp, syrtqa köz tastap ülgerdım. Adamdardyŋ barlyǧy bır jaqqa asyǧyp bara jatqan sekıldı. Vokzaldan aǧam – äkemnıŋ ınısı kütıp aldy.
Aǧam sol jaǧalauda tūrady eken. Sol jaǧalau qonaǧyn asyǧa kütetın jaŋa üi siiaqty mūntazdai eken. Aqorda, Bäiterek, Ministrler üiı, taǧy sol siiaqty biık te ädemı köz tartar ǧimarattardy, äsem de sūlu daŋǧyldardy körgende armanymmen qauyşqandai sezımge bölendım. Būiyrsa, endı elımnıŋ jüregı – Astanada oqimyn! Kanikulǧa barǧanda bauyrlaryma «apalaryŋdai jaqsy oqyŋdar» dep, menı ülgı etedı deumen armanymdy erteŋgı künge degen jaqsy ümıtpen ūştastyryp otyrdym.
Qasiettı Ramazan aiy bolǧandyqtan, anam aǧama bırden meşıtke aparuyn ötındı. Astanadaǧy «Äzıret Sūltan» meşıtı öte ädemı imani oryn eken. Äkeme, ötken ata-babalarǧa Qūran baǧyştap, meşıtten şyǧyp bara jatqanda anamnyŋ közınen tamǧan jasty baiqadym.
– Balam, äkeŋ ekeumız senıŋ Astanada oqyǧanyŋdy, bılımdı azamat bolǧanyŋdy armandauşy edık. Mıne, būiyryp, elordaǧa da keldıŋ. Bılımdı de parasatty adam retınde qalyptasyp, äke maqtanyşy bolǧanyŋdy qalaimyn, – dedı anam.
Aru qalaǧa bırden bauyr basyp, jaqsy körıp qalǧanym da jasyryn emes. Aǧam anamdy jūbatyp, maǧan kömektesetının aityp, «eşteŋeden qiynşylyq körsetpeimın» dep jatyr. Anam menı oilap, «Aqtaudan keiın Astanaǧa üirenısu qalai bolar eken?» degen siiaqty tolǧanysta bolsa, men de öz oiymmen äuremın. Astananyŋ salqyn samaly, aq maqtadai näzık būlttary, zäulım-zäulım ǧimarattary, symdai tartylǧan köşelerı, subūrqaqtary men hauyzdary, qyzyl-jasyl gülderı Jerūiyqty elestetetın siiaqty. Astana – ükılı ümıtpen jarqyn bolaşaǧyn jaqsylyqtan ızdeitın jastar qalasy. «Sol jastardyŋ bırı – menmın!» deimın ıştei.
Güljanar SAIDILLA,
Aqtau qalasy
