Bır kezderı äleumettık jelılerde bır video şarlap ketken-dı. Eŋkeigen qariia qalta telefonym ıstemei qaldy dep jas balaǧa teksertedı. Közderınde telefonnyŋ ünsız qalǧanyn balasynan emes, tehnikanyŋ aqaulyǧynan körgısı kelıp tūrǧany sezılıp-aq tūr. Alaida balasynyŋ jüregı temırden bolsa ne şara. Qarttyŋ jüregıne şegedei qadalǧan: «Telefon ıstep tūr, balaŋyzdyŋ özı şyǧar habarlaspai jürgen» degen kesım qariiany müldem eseŋgıretıp jıberedı.
Jaqynda sözden söz şyǧyp, bır äuletten ösıp-öngen 10 balanyŋ ata-anasyna degen qūrmetın qalai bıldırıp jürgenın estıp riza boldym.
Seksennen asqan ata-anasynyŋ habaryn künde bılmek bolyp alty qyzy men tört ūly kezekpen habarlasyp tūrudy dästürge ainaldyrǧan. Kelısım boiynşa aldy nemerelı bolyp jatqan on bala qarttarymen tek quanyşymen ǧana bölısuı şart. Olardyŋ jüregıne kırbıŋ tüsıretın jaittardy bıldırmeuge ūiǧarady. On jaqtan qatar habarlasqan künderı de bolǧan. Būl kün – ädettegı memlekettık emes, otbasylyq, ekı qarttyŋ jeke merekesı. Apamyz keide qulyqqa da barady eken. Keide kezegın ūmytyp ketken tentegınıŋ dauysyn estu üşın alaqandai ǧana telefonnyŋ batyrmalaryn kezekpen basyp, bar balasyn «dürlıktıredı». Ne bolyp qaldy dep alaŋdaǧan tūtqanyŋ ar jaǧyndaǧy balalarynyŋ dauysy ananyŋ janyn bır mezette jadyratyp jıberedı-aq. Kezegın ūmytyp ketken ūldyŋ qylyǧyn ūmytyp ketedı.
Būdan aitpaǧym ne? Balasynyŋ dauysyn bır estu de qartaiǧan şaǧynda demge quat. Tün ūiqysyn ūrlaǧanda, kündız ǧana habaryn bılgen balasynyŋ sergek dauysy qūlaǧynda tūrsa, tekke oilap uaiymdamaidy. Sol üşın bar bolǧany telefonnyŋ bır nüktesın basu kerek. Sol nüktede şeksız baqyttyŋ kıltı jatyr. Ärine, tüsıngen janǧa.
Äleumettık jelılerdıŋ keide osyndai oiǧa jeteleitını jaqsy. Sonyŋ bırınde Nūrtai Ernazar degen azamat «Äkem üige kelgen saiyn balalarymnyŋ qolyna aqşa ūstatyp: «Mynany ataŋa bıldırmei qaltasyna salyp qoi» deuşı edım. Olar: «Nege olai ısteisız?» deidı. Men «aşyq berseŋ almai qoiady, ary-berı jürgende qaltasynda aqşa bolu kerek, zeinetaqysy az ǧoi» dep tüsındıruşı edım. «Ataŋa ne ısteseŋ, aldyŋa sol keledı» degen ras-au, qazır qaltamda tūrǧan basy artyq aqşany baiqap qalam. Balalarymnyŋ syilyǧy ekenın ışım sezedı» dep jazypty.
Būl da jürektı jylytady. Kelısesızder ǧoi?
