Önegelı otbasy örısı
Beisenbı künı Oquşylar saraiynda qalalyq «Mereilı otbasy» ūlttyq konkursynyŋ jeŋımpazdary marapattaldy.
Būl tamaşa baiqau Elbasynyŋ bastamasymen osydan bes jyl būryn qolǧa alynǧan bolatyn. Sodan berı saiys barlyq öŋırde ötetın dästürge ainaldy. Aituly şaranyŋ babadan jalǧasqan otbasylyq qūndylyqtyŋ qadırın ardaqtauǧa qosar ülesı mol.
Biylǧy baiqauǧa elordadan 51 otbasy baq synady. Olardyŋ qatarynda köp balaly otbasylar, därıgerler, ūstazdar, önerpazdar, sportşylar, äskeriler jäne käsıpkerler äuletı boldy. Jüldegerlerdı arnaiy komissiia müşelerı anyqtady. Konkurstyŋ qorytyndysy boiynşa üşınşı oryn ekı otbasyǧa berıldı. Olar – Öteuılevter jäne Üderbaevtar. Jūrtşylyqqa Öteuılev degen familiia jaqsy tanys. Būl – bas şahardaǧy Q.Quanyşbaev atyndaǧy qazaq
teatrynyŋ beldı akterı Nürken Öteuılevtıŋ äuletı. Onyŋ zaiyby Ainūr da tamaşa aktrisa. Ekeuı de Qalleki teatrynda jūmys ısteidı. Olardyŋ Beibarys, Aqarys degen önerlı ekı ūly bar. Kino salasyna talpynyp jürgen jetkınşekter. Qazırdıŋ özınde Aqarys kinoteatrlardaǧy multfilmderge qazaqşa
dubliaj jasaidy. Al Üderbaevtar şaŋyraǧynyŋ otaǧasy – äskeri salanyŋ mamany. Tärtıptı jaqsy köredı. Jūbaiy ekeuı – ūl men qyz ösırıp otyrǧan berekelı äulet.
Ekınşı oryndy ūstazdyq joldy mūrat etken Smaiylovtar men köp balaly Aitqalievter otbasy ielendı. Būl qos äuletke alǧys hat pen aqşaly sertifikatty qalalyq Ardagerler keŋesınıŋ töraǧasy Sansyzbai Esılov tapsyrdy.
Al baiqaudyŋ bas jüldesın äskeri otbasy Bauberıkovter men därıgerler äuletı Erekeşevter jeŋıp aldy.
Qūdai bergen tört bala tärbielep otyrǧan Ǧani jäne Äsel Bauberıkovter – äskeri mamandar. Şaŋyraqtyŋ otaǧasy Ǧani Reseide üş jyl oquǧa barǧanda özımen bırge otbasyn alyp ketken eken. Balalary Mäskeudegı mektepte bılım alǧan. Sonda jürgende qatarlastarynan ozyq şyǧyp, «Resei bılgışterı» saiysynda top jarǧan. Qazır de ol jetkınşekterdıŋ oqu olimpiadalarynan qanjyǧalary bos qaitqan emes. Bauberıkovtermen bırge baiqauda asyǧy alşysynan tüsken Erekeşevter äuletınıŋ tıregı Asylbek – şahardaǧy №1 perinataldyq ortalyqtyŋ hirurgy. Jūbaiy Manira da aq halatty abzal jan. Ekeuı Almatydaǧy medisina universitetı qabyrǧasynda tanysyp, otau qūrǧan. Olardyŋ ülken ūly Aian bügınde äke-şeşesınıŋ jolyn quyp, S.Asfendiiarov atyndaǧy Qazaq ūlttyq medisina universitetınde oqidy. Būl jeŋımpaz otbasylarǧa alǧys hat pen qarjylai sertifikatty Parlament Mäjılısınıŋ deputaty, Auǧan soǧysynyŋ ardagerı Baqytbek Smaǧūl
tabys ettı.
Üzdık şyqqan ekı otbasy qyrküiek aiynda ötetın respublikalyq konkursqa joldama aldy.