Jas ūrpaqqa önege körsetu, patriottyq tärbie beru qoǧam aldyndaǧy asa maŋyzdy mındetterdıŋ bırı ekenı anyq.
Osy oraida, Auǧanstan soǧysyn bastan keşken jauynger-internasionalister ūiymdary belsendılık tanytyp jürgenı belgılı. Jaqynda ötken Auǧanstan soǧysy ardagerlerı ūiymdarynyŋ «Qazaqstan ardagerlerı» qauymdastyǧynyŋ kezekten tys sezı barysynda atalmyş ūiymnyŋ maqsat-müddesın bılıp qaittyq.
Elımızdıŋ barlyq aimaqtaryndaǧy Auǧanstan soǧysy ardagerlerı ūiymdarynyŋ jūmysyn üilestıruşı qauymdastyqty basqaryp kelgen Halyq qaharmany, Mäjılıs deputaty Baqytjan Ertaev kezektı sezde özınıŋ Qazaqstan Respublikasy Ardagerler ūiymdarynyŋ Üilestıru keŋesıne töraǧa balyp sailanuyna bailanysty qauymdastyq basşysy mındetınen bosatylatynyn mälım ettı. Osyǧan bailanysty qauymdastyqtyŋ esep beruı tyŋdalyp, jaŋa töraǧany sailau öttı. Qauymdastyqqa müşe oblys ūiymdarynan kelgen delegattar būl mındettı atqarudy Auǧanstan soǧysynyŋ ardagerı, Parlament Mäjılısınıŋ deputaty Baqytbek Smaǧūlǧa senıp tapsyrdy.
Qauymdastyqtyŋ bolaşaqtaǧy baǧyt-baǧdaryn aiqyndaǧan jiyn barysynda Auǧanstan soǧysynda qaza bolǧan jauyngerlerdıŋ analaryna qūrmet körsetılıp, materialdyq kömek berıldı. Sezd jūmysyna qatysqan delegattar men qauymdastyqtyŋ jaŋadan sailanǧan basqarma müşelerı jas ūrpaqqa patriottyq tärbie beru jönındegı oilaryn ortaǧa salyp, osy baǧytta jūmys jürgızudıŋ josparyn aiqyndady.
«Auǧanstan soǧysy ardagerlerı ūiymdary qauymdastyǧynyŋ eŋ negızgı maqsattary, būl – elımızde bolatyn saiasi-äleumettık şaralarǧa belsendılıkpen qatysu, Otan aldyndaǧy antyna adaldyq tanytyp, soǧysta qaza bolǧan qarulas dostardyŋ ata-analaryna qoldau körsetu, habar-oşarsyz ketken qazaqstandyq jauyngerlerdıŋ taǧdyryn anyqtau bolady. Sonymen qatar, bızdıŋ qauymdastyq üşın jastardy otandyq patriotizmge tärbieleu – eŋ basty mındetımız bolyp qala beredı. Būl bızdıŋ paryzymyz»,– dedı jiyn qorytyndysynda qauymdastyq basşysy, jauynger-jazuşy, halyq qalaulysy Baqytbek Smaǧūl.
Ǧalym QOJABEKOV
