10 qazanda elordadaǧy Täuelsızdık saraiynda «Aqyldy qalalar – aqyldy destinasiialar» atty VIII jahandyq sammitıne orai baspasöz mäslihaty ötkızıldı. Sammittıŋ negızgı ūiymdastyruşylary – Nūr-Sūltan qalasynyŋ äkımdıgı jäne BŪŪ UNWTO Düniejüzılık turistık ūiymy.
Qazaqstan üşın turizm tek ekonomikany alǧa süireuşı küş qana emes, sonymen bırge älemge elımızdı zamanaui jäne joǧary damyǧan memleket retınde tanytuǧa mümkındık beredı. Sol sebeptı respublikada būǧan deiın älemdık deŋgeidegı bırtalai konferensiialar men sammitter ötkızılgen bolatyn. Atalǧan şaralar qazaq dalasyna turister nazaryn audartty.
Sammitte «aqyldy» qalalardy damytu arqyly şahardyŋ kökeikestı mäselelerın şeşu, qalany basqaru, tūraqty damu, innovasiialar men ozyq tehnologiialardy engızu joldary äŋgıme özegıne ainalady.
– Qalalyq turizmdı damytu jönındegı 8-jahandyq sammittı Nūr-Sūltan qalasynda ötkızu – bız üşın märtebe. Astanamyz «aqyldy» qalalar jüiesıne endı. Bız būl şaraǧa köpten daiyndaldyq, onyŋ el damuy üşın maŋyzy orasan. Atalǧan şaraǧa qatysuǧa 80 elden 1300-den astam meiman keldı. Şara barysynda «aqyldy» qalalardyŋ artyqşylyǧy men problemalary egjei-tegjeilı talqylanatyn bolady, – dep bastady sözın Nūr-Sūltan qalasynyŋ İnvestisiialar jäne käsıpkerlıktı damytu basqarmasynyŋ basşysy Erlan Bekmyrzaev baspasöz mäslihatynda.
Bügınde köptegen memleketter «aqyldy» qalaǧa ainaluǧa köp küş salyp otyr. Sebebı «aqyldy» qala arqyly ekologiialyq infraqūrylymdy jetıldıruge, qylmys deŋgeiın azaituǧa, qala tūrǧyndary men elge keletın turisterdıŋ ömırı men qauıpsızdıgın qamtamasyz etuge qol jetkızu mümkındıgı mol.
– Qalany damytu – memlekettı damytu. Ol bükıl älemdı damytuǧa jeteleidı. Būl degen – tūraqtylyq. «Aqyldy» qalaǧa ainalu arqyly jer-jahandaǧy tūraqtylyqqa qol jetkızuge bolady, – dedı UNWTO Düniejüzılık turistık ūiymnyŋ Turizm naryǧyn jäne bäsekege qabılettılıgın taldau organynyŋ basşysy Ms. Sandra Carvao.
Sammit şeŋberınde, sonymen bırge, UNWTO akademiiasy men halyqaralyq kongrester jäne konferensiialar (ICCA) qauymdastyǧynyŋ mūryndyq boluymen qala turizmı industriiasy boiynşa şeberlık saǧattary ötkızıledı.
– Mūndai sammit Orta Aziia aumaǧynda alǧaş ret ötkızılıp otyr. Onyŋ ūiymdastyruşylarynyŋ qatarynda bolu – bız üşın märtebe. Nūr-Sūltan qalasy infraqūrylymdyq jetıstıgı jaǧynan sammit ötkızuge äbden laiyq dep tanyldy, – dedı «Astana Konvenşn Biuro» direktorynyŋ orynbasary Helena Mahuas.
Turisterdı köptep tartu maqsatynda elordada jaqyn bolaşaqta Disneyland oiyn-sauyq parkın salu mümkındıgı qarastyrylyp jatqanyn Erlan Bekmyrzaev mälım ettı.
– Disneyland qūrylysy üşın jer telımın qarastyryp jatyrmyz. Ony infraqūrylymmen, sumen jäne elektr quatymen jabdyqtau qajet. Jaqyn arada jer uchaskesın jäne investordy anyqtaimyz. Degenmen Disneyland salǧannan keiın ol öz qarajatyn aqtaityn boluy kerek. Astananyŋ klimaty Qyzylordadaǧydai emes. Oiyn-sauyq ordasy jyl on ekı ai jūmys ıstep tūruy tiıs. Sondyqtan ony jabyq park retınde saludy oilastyrǧan jön, – dedı basqarma basşysy.
Resmi derek boiynşa är turist ortaşa eseppen alǧanda elordada 1,5 täulık kıdıredı eken. Olardyŋ är künı elge 100 dollar tabys äkeledı. Qazırgı künı «Bozoq» tarihi-mädeni mūra jobasyn äzırleu arqyly turister 3 täulıkke deiın kıdırtu jaiy oilastyrylǧan.
Sözımızdı tüiınder bolsaq, Qazaqstannyŋ astanasy Global Destination Cities Index reitingı boiynşa 197-oryndy ielengen. Keiıngı 10 jylda Nūr-Sūltanǧa keletın şeteldık meimandardyŋ sany 11,7 paiyzǧa artyp, 2018 jyly ol 200 myŋ adamdy qūraǧan.
