Astana qalalyq Dın ısterı basqarmasynyŋ ūiymdastyruymen elordadaǧy belsendı jastar men ūiymdarǧa arnalǧan «Jaŋa dıni qozǧalystar jäne Qazaqstannyŋ qauıpsızdıgı: jastar közqarasy» atty taqyrypta döŋgelek üstel öttı.
Bügıngı taŋda älemde dıni ekstremizm men terrorizm mäselelerı özektı sanalyp otyr. Şyrmauyqtai şyrmalǧan dünieden şyǧu da oŋai emes. El qauıpsızdıgıne qauıp töndıretın jat aǧymdarǧa esıktı bekıtıp ūstau qajet. Onyŋ keŋ taralmauynyŋ tiımdı bır joly – aqparattyq-nasihattyq jūmystardy keŋırek jürgızu. Äsırese, jastar arasynda.
Osy maqsatta ötkızılgen mäjılıstıŋ mänı de özgeşe boldy. Elordadaǧy joǧary bılımdı oqu oryndarynyŋ ökılderı, teologtar, qoǧamdyq ūiymdardyŋ qyzmetkerlerı dıni qūndylyqtar jönınde saliqaly söz örbıttı. Dıni mamandardyŋ parasatty pıkırlerı tyŋdaldy. Jastar da öz oilaryn jetkızdı.
– Jastar – elımızdıŋ erteŋgı qanaty. Olardyŋ alaŋsyz bılım alyp, azamat bolǧanyn qalaimyz. Türlı dıni jat aǧymdarǧa arbalmasa eken deimız. Sondyqtan bas qaladaǧy joǧary oqu oryndarynda bılım alyp jatqan bedeldı, aitar oiy bar, ozat jastardy jinap, dıni mäseleler jaiynda söz qozǧadyq. Olardan köp ümıt kütemız. Alǧyr jastar öz zamandastaryna dıni qūndylyqtar turaly äŋgıme örbıtıp, aqparattyq-nasihat jūmystaryn jürgızbek, – deidı elordalyq Dın ısterı basqarmasynyŋ basşysy mındetın atqaruşy Nūrdäulet Älmūqanov.
Azamat ESENJOL
