Аталған жоба Астана қаласы әкімдігінің қолдауымен жүзеге асты. Биылғы қаңтар айында ұйымдастырылған іріктеуден өткен 5-17 жас аралығындағы 20 бала театрға қабылданды. Содан кейін музыка мамандарынан вокалдан және актерлік шеберліктен сабақ ала бастады. Тәжірибелі педагогтардан екі айға жуық дәріс алып, өткен аптада сахнаға шығып, өнерлерін көрсетті. Театрдың көркемдік жетекшісі Бақытжан Тажиновтың айтуынша, болашақта бұл балаларды түрлі қалалық, республикалық және халықаралық деңгейдегі концерттерге қатыстырып, шеберліктерін шыңдау жоспарлануда.
«Қазір театрға қабылданған балалардың музыкалық мүмкіндіктерін, актерлік қабілеттерін тексерудеміз. Оларға әртіс сахнада өзін қалай ұстау керек, әртіс пен көрерменнің қарым-қатынасы қандай болуы қажет, шығармашылық тұрғыдан өсу үшін ізденістің керектігін, ұжымдық жұмыстың ерекшелігін ұғындырып, түсіндірудеміз. Нағыз әртіс соның бәрін сезінуі тиіс. Сол кезде ғана ол сахна не екендігін түсіне алады» дейді ол.
Көркемдік жетекші Қазақстанда дарынды балалар мен жасөспірімдердің көптігін, театрға іріктеу кезінде осыған көз жеткізгенін айтады. «Мемлекет пен тиісті мекемелер мәдениет пен өнердің дамуына көп көңіл бөлуде. Елімізде жыл сайын балалар мен жасөспірімдер арасында концерттер, байқаулар мен фестивальдер көптеп өткізілуде. Мұның мақсаты – тек өнерді дамыту ғана емес, жас таланттарды тауып, олардың шеберліктерінің шыңдалуына жағдай жасау, олар өздерін толық мәнді әртіс ретінде сезіну үшін алаң дайындау» дейді Б.Тажинов.
Оның айтуынша, «Jas ‘Art» балалар эстрада театрының әртістерін болашақта ірі көлемдегі балаларға арналған мюзиклдарға қатыстыру ойда бар.
Аманғали Қалжанов
Материалды «Астана ақшамы» газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
