ҚАҺАРМАНДАРҒА ҚҰРМЕТ
Кеше Астана әкімі Әсет Исекешев елордада тұратын 1986 жылғы Желтоқсан оқиғасына қатысушыларды қабылдап, «Желтоқсанның 30 жылдығы» естелік медалін табыстады. Жылы жүздесуде қала басшысы жиналғандарды халқымыз үшін қастерлі мереке – ел Тәуелсіздігінің 25 жылдығымен құттықтап, мерейтой аясында өтетін шараларға қатысуға шақырды.
– Тәуелсіздік – сан ғасырлар бойы азаттық жолында күрескен халқымыздың басына қонған бақ. Еліміз ширек ғасырда аяғынан тік тұрып, өзге елдермен терезесі тең мемлекет ретінде қалыптасты. Тәуелсіздіктің халқымызға берген ерекше сыйы – барша Қазақстан халқының мақтанышына айналған Елбасымыздың төл туындысы – еңселі елорда екені даусыз. Астана қысқа уақыттың ішінде әлемдегі ең үздік, қарқынды дамыған қаланың біріне айналды. Елбасымыздың салиқалы саясатының арқасында ел экономикасы нығайып, халықтың жағдайы жақсарып келеді.
Осының бәрі – Тәуелсіздіктің игілігі. Мемлекет басшысы алдымызға жаңа міндеттерді қойды. Біз Мәңгілік елге айналып, әлемнің дамыған 30 елінің қатарынан орын алуға тиістіміз, – деген Әсет Исекешев Тәуелсіздік мерейтойының қарсаңындағы бұл кездесу оған қатысып отырған барша адамның есінде мәңгіге сақталатынын айтып, биыл Желтоқсан оқиғасына қатысушылардың барлығына 70 мың теңге көлемінде бір реттік төлем жасалатынын атап өтті.
Естелік медалімен жалпы алғанда 18 адам марапатталды. Солардың бірі – ҚР Парламенті Мәжілісінің аппарат басшысының орынбасары Сабыр Қасымов желтоқсандықтардың атынан қала әкіміне алғысын жеткізе келе: «Желтоқсан оқиғасына қатысушылар әу бастан Қазақстанның патриоттары болып жаралды. Отаншылдық оты бойымыздан ешқашан өшпейді. Елбасының төл перзенті – Астананы көркейту бойынша қала басшылығының жұмысына әрқашанда қолғабысымызды тигізуге даярмыз. Жақында халықаралық конференцияны өткіздік. Соған қолдау білдіріп, көмек көрсеткен елорда әкімдігіне мың да бір алғыс» деді.
Оның сөзін қостаған «Нағыз Желтоқсан» қоғамдық қорының президенті Құрманғазы Рахметов аталмыш қор он жылдан бері жұмыс істеп келе жатқанын айтып, жастардың тәрбиесіне атсалысуға дайын екендіктерін жеткізді.
Аманғали ҚАЛЖАНОВ