ДАРЫНДЫ БАЛАЛАР –ҰЛТ БАЙЛЫҒЫ
Астана қаласының әкімі Әсет Исекешев елорданың ең дарынды оқушыларымен жүздесіп, олардың үздік деп танылған инновациялық жобаларымен танысты.
Елорда басшысымен кездесуге өз қатарының ғана емес, республикалық және шет елде өткен білім бәйгелерінде жоғары жетістікке жеткен жүйріктер жиналды.
– Сіздерді алда келе жатқан Тәуелсіздіктің мерейлі мерекесімен құттықтаймын, – деп сөз бастаған Астана басшысы бас қаладағы білім беру саласының жетістіктері жайында әңгімеледі.
– Бүгінгі таңда елорда мектептерінде 129 мың бала білім алады. Соның ішінде 67 мың оқушы түрлі шараларға қатысып, өздерінің білім деңгейлері мен қабілеттерін жақсы жетістіктермен көрсетіп жүр.
Әрине, бұл – қуанарлық жағдай. Өйткені балалардың дені – өз білімдерін жетілдіруге жұмыс істейді деген сөз. Біздің оқушылар 10 жыл қатарынан республикалық олимпиадаларда «Үздік команда» атағын бермей келеді. Бұл – өте жақсы көрсеткіш, – деді Әсет Исекешев.
Жалпы, елордадағы білім беру саласында іске асып жатқан көптеген игі шараларды ауыз толтырып айтуға болады.
Биыл қалалық 324 оқушы халықаралық олимпиада мен байқауларға, ғылыми жобаларға қатысып, 267 медальмен марапатталған. Өткен жылы елордадағы №3 және №15 мектептерде «смарт-мектеп» жобасы іске асырылды. Алдағы жылы «электрондық күнделік» жобасы жүзеге аспақ. Ол мектеп оқушыларын ауыр сөмке көтеруден арылтып, ата-аналардың оқу үдерісіне қатысуына мүмкіндік береді. Қала әкімі егемендік алғаннан бері еліміздегі білім беру саласында көптеген жақсы бағдарламалар қабылданғанын айтты. Бүгінде оқимын деген жастарға жол ашық, шетелде, зияткерлік мектептерде білім алуға, ғылыммен айналысуға барлық жағдай жасалған. Сондықтан жас құрақтай желкілдеп өсіп келе жатқан жаңа ұрпақ алғыр, білімді, олардың болашағынан көп үміт күтуге болады деген ізгі лебізін білдірді.
Еркін пікірталас форматында өткен кездесуде жеткіншектер де өз ойларын ортаға салып, алдағы жоспарларымен бөлісті. «Нұр Орда» мектебінің оқушылары робототехника саласындағы жетістіктерін көрсетті. 8-сынып оқушылары түс гаммаларын сұрыптайтын роботтарды және екі минутта кубик жинайтын робот жасап шығарған. №75 мектеп-гимназияның 9-сынып оқушысы Самат Кәмілжанның жобасы да ерекше, ол қоқыс өңдейтін шағын зауыт жасаған. Тоғыз жасында әлемнің 52 елінен 12 мың адам қатысқан Нью-Делидегі ментальді арифметикадан өткен жарыста жеңімпаз атанған, бүгінде онға толған «Калькулятор бала» Ілияс Тоқтарханның таланты елорда басшысын таңқалдырды. Ол Әсет Өрентайұлының қойған есеп сұрақтарына дәл жауап беріп, дән риза етті.
Осындай дарынды оқушылардың өнерін тыңдап болғаннан кейін Астана әкімі сөзін одан әрі жалғады.
– Жаңа көрмеде робототехника бойынша қызықты жұмыстарды көріп,
риза болдым. Біздің оқушылар идеялардың ерекшелігі жөнінен студенттердің келесі буынын басып озды.
Маған үздік интеллектуалдық жобаларды ынталандыру керек деген ой келді. Әкімдік инновациялар саласындағы үздік жұмыстарға грант түрінде 10 млн теңге бөлетін болады, – деді ол.
Одан кейін елорда басшысы алдағы жылы білім беру саласында іске асатын жобалар туралы айтты. «Біз келесі жылы 10 инновациялық мектеп ашуды жоспарлап отырмыз. Кәсіпкерлермен, ұлттық компаниялармен бірлесіп, бұл мектептерде белгілі бір мамандықтарды қолдайтын боламыз. Мысалы, ол роботты техника немесе ақпараттық технология, не химия болуы мүмкін» деді Әсет Исекешев.
Әкімнің айтуынша, елордалық екі мектеп «Қазатомөнеркәсіп» АҚ-мен осындай уағдаластыққа қол жеткізген. Сонымен бірге, Астана оқушыларының ғылыми, өнертапқыштық қабілеттерін одан әрі дамыту мақсатында Назарбаев университеті мен басқа да жоғары оқу орындары арасында келісім жасалған.
Азамат ЕСЕНЖОЛ