Индонезияның Жакарта және Палембанг қалаларында 19 тамыз күні кезекті XVIII Азия ойындары сөреден шықты. Турнирдің бірінші күні мұнда 21 медальдар жиынтығы сарапқа салынды. Әзірге Қытай спортшылары топ бастап келеді. Осы аралықта Қазақстан командасы қоржынға 1 алтын, 2 күміс және 3 қола медаль түсірді.
Мұнда Қазақ елінің намысын 440 спортшы қорғағалы тұр. Олар 25 олимпиялық спорт түрі бойынша өтетін 37 жарыста күш сынасады.
Ойындар 2 қыркүйек күні мәреге жетеді.
19 тамыз, бірінші күн
Дмитрий Алексанин – алтын жүлдегер. Ойындардың беташар күні Қазақстан құрамасының қоржынына семсерлесуші Дмитрий Алексанин алғашқы алтын медальді салды. Ол жартылай финалда 2012 жылғы Лондон Олимпиадасының қола жүлдегері кореялық Джунг Джин Сунды 15:12 ұпайымен жеңді. Ал финалда Дмитрий тағы бір корей атлеті – 2016 жылғы Рио Олимпиадасының чемпионы Пак Сан Енді 15:12 етіп тізе бүктірді.
Жалпы, бұл – Диманың Азиададағы екінші жүлдесі. Ол 2014 жылы Сеулде өткен Ойындарда командалық жарыста қола жүлдегер атанған. Біздің алтын жүлдегер жарыс соңында өзінің бұл табысын жақында кісі қолынан қаза тапқан мәнерлеп сырғанаушы Денис Тенге арнайтынын айтты.
Данияр Қайсенов – күміс жүлдегер. Еркін күрестен 74 килоға дейінгілер арасында ел намысын қорғаған спортшымыз финалда өзбек Бекзод Абдурахмоновқа 2:3 есебімен есе жіберіп алды. Ол финалға дейін екі қарсыласынан басым түсті.
Саятбек Оқасов – қола жүлдегер. Турнирде 65 килоға дейінгі салмақта боз кілемге шыққан Саятбек Оқасов үшінші орын үшін таласта абырой биігінен көрінді. Ол түрікмен Батыр Борджаковтан айласын асыра білді – 5:2.
Әділет Дәулімбаев – қола жүлдегер. Командаға екінші қола жүлдені де еркін күрес шебері әкелді. 86 кг салмақта күш сынасқан палуанымыз қырғызстандық Алигаджи Гамидгаджиевті 3:0 есебімен ұтты.
Теннис. Қазақстанның екі аралас жұбы бірінші күнгі шайқастарда жеңіске жетті. Атап айтқанда, Анна Данилина – Александр Недовесов вьетнамдық Ксилла Фодор – Минх Туан Фамды 6:4, 6:4 етіп тізе бүктірсе, Гозаль Айнитдинова – Тимур Хабибулин Вьетнамның келесі өкілдері Фуонг ван Нгуен – Саванна Нгуенді 6:2, 6:2 есебімен ұтып шықты.
Көгалдағы хоккей. Еліміздің әйелдер құрамасы бірінші матчында Таиланд командасынан 3:1 есебімен басым түсті. Біздің қыздар арасында Вера Домашнева, Наталья Гатаулина және Наталья Сазонтова мергендіктерімен танылды.
Ватерпол. Тағы бір әйелдер құрамасы Гонконгтан келген әріптестерін 22:2 есебімен күйрете жеңді. Мұның алдында олар тай қыздарын 13:4 ұпайымен ұтып, қытайлықтардан 4:11 болып жеңіліп қалған еді.
Волейбол. Таспа доптан еліміздің әйелдер құрамасы өзінің бірінші кездесуінде Тайпей қыздарын 3:1 етіп ұтты.
Гандбол. Қазақстанның қол добышы қыздары КХДР жасағына 33:37 есебімен жол беріп алды. Мұның алдында олар үндістандық құрбыларын 36:19, қытайлықтарды 27:26 есебімен жеңген болатын.
Баскетбол. Еліміздің баскетболшы қыздары бірінші күні Индонезия құрамасынан 85:73 есебімен басым түсті. Мұның алдында біздің құрама Тайпейден 42:72 болып ұтылып, Үндістанды 79:61 етіп жеңген еді.
20 тамыз, екінші күн
Фариза Алдонғарова – қола жүлдегер. Қазақстандық таэквондошы 53 кг салмақта ел қоржынына үшінші қола медальді салды. Алғашқы айналымда өзбекстандық Динорахан Мамадибрагимованы, ширек финалда ирандық Элах Шейдайды жеңген Алдонғарова жартылай финалда тайпейлік Си По Янға есе жіберді.
Жұлдыз Ешімова – күміс жүлдегер. Ол 53 кг салмақта күресіп, финалда Солтүстік Кореяның балуаны Пак Йонг Миден жеңілді. Оған дейін Ли Чен Хені (Оңтүстік Корея), Джантима Вирангсаны (Таиланд) және Ерденечимегей Сумяны (Моңғолия) жеңді.
Дайындаған
Дамир ҚОЖАМҚҰЛ
