Астананың тәттіқұмар тұрғындарын Тәуелсіздік сарайында тосын сый күтіп тұр. Наурыздың 18-інде «Nikolya» шоколад музейі елордаға ат басын тірейді. Бұл күні қала халқы танымал шебер Николай Поповтың шоколадтан жасалған заттарымен танысады.
Әйгілі көрме әлемнің 40-тан аса қаласында қонақта болыпты. Оны жарты миллионға жуық адам тамашалаған. Наурыз мейрамы қарсаңында бас шаһарда ұйымдастырылатын атақты шарада 300-дей өнер туындысы көпшілік назарына ұсынылады. Жалпы салмағы 700 келі тартатын шоколад пен марципаннан әзірленген картиналар, миниатюралар, инсталляциялар жұртшылықты таңдай қақтыратыны сөзсіз. Айтпақшы, бұйымдардың арасында Қазақстанға, соның ішінде Астанаға арналған шоколад өнімдерінің сериясы бар.
Көрмеде шебердің бірегей технологиясымен орындалған эксклюзивті кәдесыйлар сатып алуға болады. Сондай-ақ, келушілер шеберлік дәрістеріне қатысып, өз қолымен тәтті заттар даярлауды үйренеді. Жиын барысында шоколад тарихы туралы қызықты фильм көрсетіледі.
Ботагөз МАРАТҚЫЗЫ
Материалды «Астана ақшамы» газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
