ТІЛДЕР ТҰҒЫРЫ
22 қыркүйекте «Астана»
концерт залында Қазақстан халқы тілдерінің XIX қалалық фестивалінің шымылдығы түріледі.
Әдемі дәстүрге айналған фестиваль аясында бірнеше шара жоспарланған. Айталық, 26 қыркүйекте қазақ әдебиетінің алыбы, хакім атамыздың шығармаларын кеңірек насихаттау мақсатында «Абай – дана, Абай дара қазақта» атты қалалық байқаудың байрағы желбіремек. Онда қалалық әкімдікке қарайтын мемлекеттік мекемелердің қызметкерлері бақ сынайды. Дәл осы күні «Жастар»
театрында «Рухани жаңғыру – отбасынан басталады» деген әдеби кеш өтеді.
Сөз арасында айта кетейік, аталған шара шеңберінде Жамбыл Жабаев атындағы №4 мектеп-гимназиясында «Отбасындағы әкенің рөлі» атты әкелерге арналған дөңгелек үстел мәжілісі өтті. Оған мәдениет қайраткері Оспан Сүлейменов, ақын Алмахан Мұхамедқалиқызы, дінтанушы Тышқан Кеңшілікұлы, «Қазақстан» ұлттық арнасының шеф-редакторы Айдос Әшім және полиция лейтенанты Біржан Намазбаев
қатысып, қазақ шаңырағындағы ер-азаматтың орны қандай, отбасындағы тұрақтылықты қалай сақтап қаламыз деген мәселелер төңірегінде сөз қозғап, оқушыларға өнегелі әңгіме өрбітті.
Айтулы фестиваль 28 қыркүйекте шымылдығын жабады. «Астана» концерт залында елорда әкімінің тіл жанашырларына арналған «Тіл тұғыры» деген құрметті марапаты тапсырылады. Соңы гала-концертке ұласады. Онда «Алашұлы» тобы, Қайрат Нұртас, Қарақат Әбілдина және жетігеншілер тобы, ағайынды Жүгінісовтер, Шахаризат Сейдахмет секілді елге танылған әншілер өнер көрсетпек.
Азамат Құсайын