«Үш ай бойы әлем назарын аударған «ЭКСПО-2017» халықаралық мамандандырылған көрмесі еліміздің абыройын асқақтатып қана қойған жоқ, жергілікті полиция қызметіне қоғамдық тәртіпті сақтауда, жол жүру ережесін қадағалап, көрмеге қатысушы шетелдік қонақтар мен қарапайым азаматтардың қауіпсіздігін қамтамасыз етуде мол тәжірибе жинау мүмкіндігін туғызды» деді Астана қаласы әкімдігінде өткен «ЭКСПО-2017» көрмесі кезінде елордадағы қауіпсіздік пен құқық тәртібін қамтамасыз ету» тақырыбына арналған баспасөз мәслихатында Астана қаласы Жергілікті полиция қызметінің бастығы Бақытжан Малыбаев.
Жеке құрам тәулік бойы жұмыс істеп, қоғамдық тәртіпті қадағалауға 9 мыңға жуық қызметкер тартылса, тікелей көрме аумағында қауіпсіздікті сақтауға 4 мыңнан аса сақшы қызмет етті. Әсіресе, ағылшын тілін меңгерген 200 ерікті мен ҚР ІІМ жоғары оқу орындарының 500 курсанты мен офицері белсене атсалысты.
Көрме кезінде қауіпсіздікті қамтамасыз ету мақсатында қала әкімінің өкімімен Ахуал орталығы құрылды. Арнайы құрылған штабта мамандардың күнделікті кезекшілігі ұйымдастырылды. Учаскелік полиция инспекторлары есептегі контингентті, қару иелерін тексеріп, аулалар мен пәтерлерді аралау, бейәлеуметтік бағыттағы тұлғаларлы анықтау жұмыстары күшейтілді. Соның нәтижесінде көшедегі қылмыс – 19 пайызға, қоғамдық орындардағы тәртіп бұзушылық 2,2 пайызға төмендеді.
Қауіпсіздік пен құқық тәртібін қамтамасыз етудің заманауи жүйесі құрылды. Озық тәжірибе мен жаңа технологиялар қолданылды. Адамдар жаппай жиналатын жерлерде, басқа да маңызды нысандарда видеобақылау жүйесі желілері кеңейтілді. Көрмеге кіретін жерлер айрықша бақылауға алынып, бет-әлпетті танып, талдайтын бейнесараптама жұмыс істеді. Сол арқылы құқық қорғау органдарының арнайы мәліметтер қорына келушілердің құжаттары тіркеліп отырды.
Баспасөз мәслихатында ішкі істер органдарындағы жаңа мамандар – профайлер туралы да сұрақтар қойылды.
«Бұл бізге ЕҚЫҰ кезінен таныс. Осы мамандыққа қатысты ЕҚЫҰ өкілдері екі рет оқыту, тәжірибе алмасу сабақтарын өткізген болатын. Профайлер дегеніміз – ең шұғыл қимылдайтын, қазіргі заман талабына сай қызметкерлер. Оларға «ЭКСПО» көрмесінің алдында халықаралық дәрежедегі психологтар дәріс берген еді. Мамандық иелері әлеуметтік қауіпті адамдарды жүріс-тұрысынан, сөзінен, қимыл-қозғалысынан, киім киісінен әп сәтте аңғарып, шұғыл шешім қабылдай алады» дейді Астана қаласы Ішкі істер департаменті әкімшілік полициясының бөлім бастығы Тимур Қазыбаев.
«Осы бағытта күш құрылымдарында аз ғана уақыттың ішінде өзара тығыз қарым-қатынас орнап, озық тәжірибе қалыптасты. Бұрын есепте тұрған күдікті адамдар туралы ақпараттар алмасылып, мәліметтер нақтыланды. Криминалды полиция, есірткімен күрес және учаскелік полицияның күнделікті жұмыстарында арнайы дайындықтан өткен жүзден аса қызметкер халықаралық дәрежедегі маңызды іс-шараның ойдағыдай өтуіне белсене атсалысты» деді ол.
– «ЭКСПО» халықаралық мамандандырылған көрмесі аумағында біз, негізінен, алдын алу іс-шараларымен айналыстық. Қауіп туғызатындай оқиға болған жоқ. Кейбір темекінің тұқылын тастау, белгіленбеген жерден жүру сияқты ұсақ-түйек тәртіп бұзушылықтар болмаса, қылмыскердің кіріп кетуі немесе қару алып өтуге әрекеттену деген сияқты мәселелер тіркелген жоқ. Әрине, тыйым салынған заттарды ұмытып, қалталарына салып алып келу, кездік, селебе тәрізді суық қарулардың табылған сәттері болды. Алайда ол белгілі бір теріс мақсатты көздегендіктен емес, салғырттықтан орын алып жатты, – деді Бақытжан Малыбаев.
Осылайша, құқық қорғау мен арнаулы орындардың көрмеге дайындық және көрмені өткізу кезіндегі қарқынды жұмысы қауіпсіз қалаға тән ахуал қалыптастырып, қылмыс деңгейінің төмендеуіне әрі Астананы ең қауіпсіз қала деп тануға мүмкіндік туғызды.
Таңатар ТӨЛЕУҒАЛИЕВ
