ەكى كۇنگە سوزىلعان استانا ەكونوميكالىق فورۋمى ەلباسى نۇرسۇلتان نازارباەۆتىڭ قاتىسۋىمەن وتكەن ارنايى پلەنارلى وتىرىستا قورىتىندىلاندى. «قازاقستان» ورتالىق كونتسەرت زالىنداعى جيىندى ۇيلەستىرۋشى رەتىندە اشقان «The Independent» گازەتىنىڭ باس ەكونوميكالىق شولۋشىسى حەميش ماكرەي بيىلعى فورۋمنىڭ اۋقىمى جايىندا ايتا كەلىپ, قازاقستاننىڭ ەكونوميكالىق جەتىستىكتەرىنە ارنايى توقتالدى.
باستى جيىنعا دۇنيەجۇزىلىك ساۋدا ۇيىمىنىڭ باس ديرەكتورى روبەرتۋ ازەۆەدۋ, ەۋروپا قايتا قۇرىلىمداۋ جانە دامۋ بانكىنىڭ پرەزيدەنتى (ەققدب) سۋما چاكرابارتي, AliBaba Group ينتەرنەت-كوممەرتسيا سالاسىنداعى قىتاي كومپانياسىنىڭ نەگىزىن قالاۋشى دجەك ما, كولۋمبيا ۋنيۆەرسيتەتىنىڭ جەر ينستيتۋتىنىڭ ديرەكتورى جانە The Economist بريتان جۋرنالىنىڭ نۇسقاسى بويىنشا الەمنىڭ ەڭ بەدەلدى ءۇش ەكونوميسىنىڭ ءبىرى دجەففري ساكس, ماسساچۋسەتس تەحنولوگيالىق ينستيتۋتىنىڭ ەكونوميكا پروفەسسورى, دجون بەيتس كلارك مەدالىنىڭ 2005 جىلعى يەگەرى دارون ادجەموگلۋ سياقتى الەمگە بەلگىلى تۇلعالار قاتىستى.
الدىمەن ءسوز العان پرەزيدەنتتىمىز نۇرسۇلتان نازارباەۆ قازاقستاننىڭ مەملەكەت بولىپ قالىپتاسۋدا قانداي قيىن بەلەستەردى ارتقا تاستاعانى جونىندە اڭگىمەلەدى.
ءبىزدىڭ ەلىمىزدىڭ 25 جىل ىشىندەگى قول جەتكىزگەن بەلەستەرى, اسىرەسە ەكونوميكا سالاسىنداعى تابىستار الەمدەگى جەتەكشى ەلدەردىڭ دە قىزىعۋشىلىعىن تۋعىزعان. سوڭعى ون جىلدا قازاقستانداعى ءومىر ءسۇرۋ ۇزاقتىعى 64 جاستان 73 جاسقا دەيىن كوتەرىلۋى ايتا قالارلىقتاي جەتىستىك. ءوز كەزەگىندە ءسوز العان دۇنيەجۇزىلىك ساۋدا ۇيىمىنىڭ باس ديرەكتورى روبەرتۋ ازەۆەدۋ, ەۋروپا قايتا قۇرىلىمداۋ جانە دامۋ بانكىنىڭ پرەزيدەنتى (ەققدب) سۋما چاكرابارتي, AliBaba Group ينتەرنەت-كوممەرتسيا سالاسىنداعى قىتاي كومپانياسىنىڭ نەگىزىن قالاۋشى دجەك ما جانە باسقالارى الەمدىك ەكونوميكالىق, الەۋمەتىك جانە تاعى باسقا ماڭىزدى سالالارعا قاتىستى ناقتى ۇسىنىستار ايتا الاتىن بىرەگەي فورۋم دەگەن باعا بەردى.
مەڭدوللا شامۇراتوۆ
فوتو: ۆاسيلي كراس
