قازاقستاننىڭ ۇلتتىق وليمپيادا كوميتەتى مەن استانا قالاسىنىڭ اكىمدىگى ۇيىمداستىرعان وليمپيادا كۇنىن اتاپ وتۋگە 10 مىڭنان استام استانالىقتار قاتىستى. بۇل جىل سايىن اتالىپ وتىلەتىن شارا ەدى. الايدا, بۇرىن وسىنشا ادام جينالمايتىن. ال, بيىلعى مەرەكەنىڭ ماڭىزى ەرەكشە بولعانى وسى جازدا ۇلىبريتانيا استاناسى لوندوندا ححح جازعى وليمپيادا ويىندارىنىڭ جالاۋى كوتەرىلەدى. ياعني, الەمنىڭ ەڭ ۇزدىك سپورتشىلارى سايىسقا تۇسەدى. مىنە, وسى وقيعا ەلوردامىزدا وتكەن وليمپيادا كۇنىنە ەرەكشە رۋح بەرگەنى ايتپاسا دا تۇسىنىكتى بولدى.
سەنبى كۇنى استانالىقتار قاجىمۇقان اتىنداعى ستاديونعا اعىلدى. قاراپ وتىرساق, بەس جاسار بالا دا, الپىستان اسقان اقساقال دا وسىندا ءجۇر. استانا قالاسىنىڭ تۋريزم, دەنە شىنىقتىرۋ جانە سپورت باسقارماسىنىڭ ماماندارى كەلۋشىلەردى جاستارىنا قاراي تىركەۋدەن وتكىزىپ بولعان سوڭ سالتاناتتى شەرۋ ءوتتى. شەرۋدى ءۇش وليمپيادا ويىندارىنا قاتىسقان كونكيشى راديك بيكچانتاەۆ باستاپ ءجۇردى. ال, وليمپيادالىق مەرەكەگە قاتىسۋشىلاردى استانا قالاسى اكىمىنىڭ ورىنباسارى ەرلان قوجاعاپانوۆ سپورت جانە دەنساۋلىق مەرەكەسىمەن قۇتتىقتاپ, استانالىقتاردى تەك وسىنداي شارالار بارىسىندا عانا ەمەس, تۇراقتى سپورتپەن اينالىسۋعا ۇندەدى. وليمپيادا ويىندارىنىڭ چەمپيونى يۋري مەلنيچەنكو مەن كۇمىس جۇلدەگەرى گەورگي تسۋرتسۋميانىڭ تىلەكتەرى دە كوپشىلىكتىڭ كوڭىل-كۇيىن ءبىر كوتەرىپ تاستادى.
داڭقتى بالۋاندار بيىل وليمپيادا جىلى ەكەنىن ەسكە سالىپ, لوندوندا وتەتىن ءدۇبىرلى دودادا قازاقستان سپورتشىلارىنا قىزۋ قولداۋ كورسەتەيىك دەپ تاعى ءبىر ۇندەۋ سالدى.
وليمپيادالىق جۇگىرۋ جارىستارىنا مەملەكەتتىك مەكەمەلەر, مينيسترلىكتەر مەن ەلشىلىكتەر, جوعارى وقۋ ورىندارى مەن مەكتەپ وقۋشىلارى, رەسپۋبليكالىق ۇلان ساربازدارى مەن پرەزيدەنتتىڭ كۇزەت قىزمەتى قىزمەتكەرلەرى قاتىستى. سالاۋاتتى ءومىر سالتىن جاقتاعان اۋەسقوي جۇگىرۋشىلەر قاتارى دا از بولعان جوق.
ال, وليمپيادالىق جۇگىرۋ مەرەكەسىندە جۇلدە العاندار جايىندا ايتار بولساق, بالالار اراسىندا №10 ورتا مەكتەپ وقۋشىسى جاسۇلان اكىمجان مەن №66 ليتسەي وقۋشىسى اناستاسيا سەمەچكينا مارە سىزىعىن ءبىرىنشى بولىپ كەستى. ستۋدەنتتەر جارىسىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى ەلميرا مولداشەۆا مەن قارجى پوليتسياسى اكادەمياسىنىڭ ستۋدەنتى تۇرلىبەك امانتاي جەڭىمپاز اتاندى. باسقا جاس شامالارى بويىنشا وتكەن باسەكەلەردە ك.زەينۋللاەۆ, ە.مەدۆەدنيكوۆ, ب.نۇ را حمە تو ۆ , ا.قورىقباي, گ.كورنيلوۆا جانە ر.ميحەەۆا جەڭىس تۇعىرىنان كورىندى. ال وتباسىلار جارىسىندا بايماعامبەتوۆتار اۋلەتىنىڭ جۇلدىزى جاندى.
ءبىر اتاپ ايتارىمىز, ايتۋلى شارا داستۇردەگىدەي تەك جۇگىرىسپەن شەكتەلىپ قالمادى. ۇيىمداستىرۋشىلار توعىزقۇمالاق, شاحمات, ارقان تارتىس, دارتس سايىستارىنان دا باسەكەلەر وتكىزىپ, كوپشىلىكتىڭ كوڭىل-كۇي كوتەرە ءبىلدى.
وليمپيادا كۇنى مەرەكەسىنە ارنالعان جارىستارعا قاتىسىپ, جۇلدەگەرلەر قاتارىنان كورىنگەن استانالىقتار قالاسى اكىمدىگى مەن وسى شاراعا دەمەۋشى بولعان «سوسا سوlا» كومپانياسىنىڭ تاعايىنداعان سىيلىقتارىنا يە بولدى.
استانالىقتاردىڭ سپورت مەرەكەسى وليمپيادا كۇنىنە ارنالعان شارالارمەن عانا شەكتەلىپ قالمادى. دەمالىس كۇندەرى استانا قالاسى اكىمدىگى مەن نيدەرلاند ەلشىلىگى بىرلەسىپ ۇيىمداستىرعان ۆەلوجارىستا كوپتەگەن قالا تۇرعىندارى ءۇشىن ناعىز دەنساۋلىقتىڭ مەرەكەسىنە اينالدى. سونداي-اق, قالانىڭ داستۇرىنە اينالعان «ءومىر قۋاتىمەن شىنىق!» اتتى بۇقارالىق فۋنكتسيونالدىق جاتتىعۋلاردىڭ جاڭا ماۋسىمى دا باستالدى. ەسىل جاعالاۋىندا وتكىزىلەتىن وسى شاراعا وتكەن جىلى 6500-دەن استام ادام قاتىسقان بولاتىن. ال, بيىل بۇل كورسەتكىش ءبىرشاما كوتەرىلەتىندەي بولىپ وتىر. بۇل جونىندە استانا قالاسىنىڭ «ۇلتتىق سپورت تۇرلەرى جانە بۇقارالىق دەنە شىنىقتىرۋ كلۋبى» مەكەمەسىنىڭ ديرەكتورى ەركىن ءالجانوۆ «بۇقارالىق فۋنكتسيونالدىق جاتتىعۋلارعا قاتىسۋشىلار قاتارى كوبەيىپ كەلەدى. ءبىزدىڭ ماماندار اشىق اسپان استىندا دەنساۋلىقتى شىڭداۋعا وتە پايدالى جاتتىعۋلار وتكىزە بىلەدى. بيىل بۇل شاراعا تاعى دا قىزىقتى باعدارلامالار قوسىلادى.
سوندىقتان, قالا تۇرعىندارىن ءار اپتانىڭ جۇما كۇندەرى ەسىل وزەنى جاعاسىندا (وقۋشىلار سارايىنىڭ الاڭى) ساعات 19.00-دەن 20.00-گە دەيىن وتەتىن بۇقارالىق گيمناستيكا جاتتىعۋلارىنا شاقىرعىم كەلەدى.
دەنساۋلىعىڭىزدى كۇتۋگە جانە سەرگەك تە كوڭىلدى جۇرۋىڭىزگە كومەك كورسەتۋگە ءبىز دايىنبىز»,– دەيدى.
ولاي بولسا, سپورت شارالارىنا قاتىسىپ, ءوزىمىزدىڭ دە, قالامىزدىڭ دا سالاۋاتتى بولۋىنا ىقىلاستى بولايىق, استانالىق اعايىندار.
عالىم قوجابەكوۆ
