مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شەڭبەرىندە 21 قاراشا كۇنى رەسپۋبليكا بويىنشا «ازاماتتاردى بىرىڭعاي قابىلداۋ كۇنى» ءىس-شارالارى ءوتتى. وسى ءىس-شارالاردىڭ اياسىندا «جانۇيا» وتباسى ينستيتۋتىن قولداۋ ورتالىعىندا ەلوردا اكىمى التاي كولگىنوۆ, اكىمنىڭ ورىنباسارلارى, باسقارما باسشىلارى جانە اۋدان اكىمدەرى ازاماتتاردى قابىلدادى.
ءبىر كۇننىڭ ىشىندە 700-گە جۋىق ادام قابىلداندى. قابىلداۋعا جازىلعان تۇرعىنداردىڭ كوپشىلىگىن باسپانا الۋ, جۇمىسقا ورنالاسۋ, الەۋمەتتىك كومەك الۋ, بالاباقشا كەزەگىنە تۇرۋ, ۇلەستىك قۇرىلىسقا قاتىسۋ سياقتى وزەكتى ماسەلەلەر مازالايتىنى ءمالىم بولدى. ماسەلەن, جازىلعانداردىڭ ءبىر بولىگى جالعا بەرىلەتىن تۇرعىن ۇيگە قاتىستى ساۋالدار قويدى. التاي كولگىنوۆ تۇرعىندارعا ساتىپ الۋ قۇقىعىنسىز جالعا بەرىلەتىن پاتەردى 5 جىلدان كەيىن قايتارىپ بەرۋ مىندەتتى ەمەستىگىن ايتتى.
بۇل ساناتقا تەك جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن پاتەرلەر كىرمەيدى. «جالعا بەرىلەتىن پاتەردە شارتتى ءار 5 جىل سايىن ۇزارتىپ, ءومىر بويى تۇرا بەرۋگە بولادى. ءسىز قۇجاتتا كورسەتكەن بالالارىڭىز جالدامالى تۇرعىن ءۇي شارتىن ءوز اتىنا قايتا رەسىمدەۋگە قۇقىلى. ياعني پاتەردە قانشا ۋاقىت تۇرساڭىز دا ەرىكتىسىز» دەپ ءتۇسىندىردى قالا باسشىسى.
قالا اكىمىنىڭ ورىنباسارى ماليكا بەكتۇروۆا تۇرعىنداردىڭ گرانت, نەسيە جانە جاردەماقشا الۋعا قاتىستى ساۋالدارىنا جاۋاپ بەردى. «باس قالادا كوپ جىلدان بەرى «كوشە ساۋداسى – 1000 ورىن» اتتى جوبا ىسكە اسىرىلىپ كەلەدى. ودان بولەك, «بيزنەس باستاۋ» جانە «بيزنەستىڭ جول كارتاسى» باعدارلامالارى اياسىندا استانالىقتارعا ءوز كاسىبىن اشۋعا زور مۇمكىندىكتەر بەرىلۋدە. كوبىنەسە ازاماتتار ءىستى نەدەن باستايتىنىن, قايدا باراتىنىن بىلمەيدى. ءبىز سونى قاراپايىم تىلمەن تۇسىندىرەمىز» دەدى م.بەكتۇروۆا.
ايتارلىعى سول, ءار ازاماتتىڭ ءوتىنىشى ەلەۋسىز قالمايدى. التاي سەيدىرۇلى تۇرعىنداردى قابىلداۋ الداعى ۋاقىتتا جۇيەلى تۇردە جالعاساتىنىن ءمالىم ەتتى. وتكەن 4 ايدىڭ ىشىندە قالا اكىمى 600-گە جۋىق ادامدى جەكە ءوزى قابىلداعان. ماسەلەلەردىڭ كوپشىلىگى شەشىمىن تاپتى. سونداي-اق ازاماتتاردى قابىلداۋ اۋدان اكىمدىكتەرىندەگى open akimat-تا, قالالىق اكىمدىكتە وتەدى. ءىQala بىرىڭعاي قالالىق قىزمەت كورسەتۋ ورتالىعى الاڭىندا كاسىپكەرلەر وزدەرىن تولعاندىرعان ساۋالدارىن بيلىك وكىلدەرىنە تىكەلەي جولدايدى.
