بۇگىن ەلوردا جۇرتشىلىعى اسىق اتۋ, دومبىرا-party, الاڭداعى كاراوكە سىندى ويىن-ساۋىققا بەلسەنە قاتىسىپ, شات-شادىمان اسەرگە بولەندى. بۇل ءىس-شارالاردىڭ بارلىعى استانا قالاسى اكىمدىگى مەن تىلدەردى دامىتۋ باسقارماسىنىڭ تىكەلەي مۇرىندىق بولۋىمەن ۇيىمداستىرىلعان «كوشە مەيرامى-2016» مەرەكەلىك باعدارلاماسى اياسىندا ءوتتى.
– تاۋەلسىزدىكتىڭ 25 جىلدىعى مەن استانا كۇنىنە ارنالعان بۇگىنگى دۋمان جاڭا فورماتقا يە. ءبىز بۇرناعى جىلدارى وسى ءىس-شارانىڭ شەڭبەرىندە تەك اباي كوشەسىن نە تاۋەلسىزدىك داڭعىلىن عانا ناسيحاتتايتىنبىز. ياعني, ادامدارعا الگى كوشە تۋرالى مالىمەتتەر بەرىپ, بروشيۋرالار تاراتتىق. ال بيىلعى باعدارلاماعا سول جاعالاۋداعى ورتالىق كوشەلەردىڭ تۇگەلىن كىرگىزدىك. ماسەلەن, كەز كەلگەن ەلوردالىق ساۋران, سىعاناق نەمەسە سارايشىق كوشەلەرىنىڭ تاريحىن بىلمەۋى مۇمكىن. سوندىقتان مۇنداي اقپاراتتاردى بروشيۋرا ەتىپ قۇراستىرىپ, كوپشىلىككە ۇلەستىردىك. جيىن بارىسىندا كوشە اتاۋلارىنا قاتىستى تانىمدىق ويىندار, كىتاپ جانە سۋرەت كورمەلەرى, بالالار سايىستارى بولادى, – دەدى تىلدەردى دامىتۋ باسقارماسىنىڭ ونوماستيكا ءبولىمى باسشىسى ەرجان ەڭسەباەۆ.
ءدۇبىرلى تويعا جينالعان قاۋىمنىڭ ءبىر بولىگى اسىق اتۋدىڭ ءبىر بولىگى دومبىرا-party جارىسىنىڭ, ەندى ءبىر بولىگى كاراوكەنىڭ قىزىعىنا ءتۇسىپ كەتكەن. سولاردىڭ ءبىرى استانالىق ازات سەيداليەۆ «كوشە مەيرامىنىڭ» بەرەر ۇلگىسى جايلى ايتتى.
– نەگىزى حالىقتى وسىنداي نارسەلەر جاقىنداستىرادى عوي. بالا كەزىمىزدى ەسكە الىپ, قازىر مىنا اسىق اتۋ ويىنىنا بەلسەنە قاتىسىپ جاتىرمىز. زامانداستارىمىزبەن ارقا-جارقا ارالاسىپ, سەرگىپ قالدىق. مۇنىڭ ءوزى ۇلكەن عانيبەت ەمەس پە؟! – دەپ اعىنان جارىلدى ول.
راسىندا بۋلۆاردا باس قوسقان جاستىڭ دا, كارىنىڭ دە جۇزىنەن الاڭسىز قۋانىشتىڭ تابىن بايقادىق. ەستى ءان مەن ماعىنالى ويىن-ساۋىققا قۇمارى قانعان جۇرتشىلىق ۇيلەرىنە كوتەرىڭكى كوڭىل-كۇيمەن تارقاستى.
بوتاگوز ماراتقىزى
