استانا قالالىق تابيعي رەسۋرستار مەن تابيعات پايدالانۋدى رەتتەۋ باسقارماسى, «استانا ەكو-پوليگون نس» مەملەكەتتىك كوممۋنالدىق كاسىپورنى قىزمەتكەرلەرى مەن ءتارتىپ ساقشىلارى قالا تازالىعىنىڭ ساقتالۋىن قاداعالاۋعا قاتىستى ارنايى رەيد وتكىزگەن ەدى. رەيد بارىسىندا كوپتەگەن زاڭ بۇزۋشىلىقتار انىقتالدى.
اۋەلى دابىلدى «استانا ەكو-پوليگون نس» مكك-نى كوتەردى. ويتكەنى, بۇل كاسىپورىنمەن قالاداعى بىرنەشە ۇيىمدار پوليگونعا قوقىس اكەلىپ توگۋگە بايلانىستى كەلىسىمشارت جاساسقان ەكەن. سونىڭ ىشىندە, «كراۆەتس» جك-گى التى اي بويى پوليگونعا ءبىر توننا دا قوقىس تاسىماعان. ماسەلەن, وسىنداي كەلىسىمشارت بويىنشا جۇمىس ىستەيتىن «مەير-م» جشس جىل باسىنان بەرى پوليگونعا 721,7 توننا قوقىس اكەلىپ توكسە, «Irose roca» جشس التى ايدا 1885,74 توننا قوقىس كىرگىزىپتى. باسقا سەرىكتەستىكتەردىڭ دە كورسەتكىشىن وسىلاي تىزە بەرۋگە بولادى. ال, «كراۆەتس» جك-گى بولسا, ءبىر توننا تۇگىلى, كەلى تارتاتىن قوقىس تا اكەلمەگەن. سوندا بۇل جەكە كاسىپكەرلىك قالا قوقىسىن قايدا اپارىپ توگىپ جاتىر؟
– نەگىزى قالا بويىنشا قوقىس قابىلدايتىن مەكەمە – جالعىز ءبىزدىڭ كاسىپورىن. ونىڭ ۇستىنە «كراۆەتس» جك بىزبەن كەلىسىمشارت جاساسقان. سول بويىنشا جەكە كاسىپكەرلىك بىرنەشە پيك-مەن كەلىسىمگە كەلە وتىرىپ, ولار قىزمەت كورسەتەتىن كوپ قاباتتى تۇرعىن ۇيلەردىڭ قوقىسىن پوليگونعا اكەلىپ توگۋى كەرەك. قازىر رەيد بارىسىندا «كراۆەتس» جك قىزمەت كورسەتەتىن پاتەر يەلەرى كووپەراتيۆتەرىمەن كەزدەسىپ, ماسەلەنىڭ ءمان-جايىن انىقتايمىز, – دەدى جول باستاپ كەلە جاتقان باسشىمىز «استانا ەكو-پوليگون نس» مكك ديرەكتورىنىڭ ورىنباسارى بولات وسكەنباەۆ.
شىلدە ايىنىڭ 7 كۇنى وسىنداي ماقساتپەن اتقا قونعان ارنايى كوميسسيا, ەڭ الدىمەن, ءشامشى قالداياقوۆ كوشەسىندە №1 كوپ قاباتتى ۇيگە كەلىپ توقتادى. وسى اۋماقتاعى تۇرعىن ۇيلەرگە «گراند-استانا سەرۆيس» جشس رەتىندە تىركەلگەن پاتەر يەلەرى كووپەراتيۆى قىزمەت كورسەتەدى ەكەن. بۇل ۇيلەردىڭ قوقىسىن «كراۆەتس» جك جينايتىن بولىپ شىقتى. تەكسەرۋ بارىسىندا «گراند-استانا سەرۆيس» جشس مەن «كراۆەتس» جك اراسىندا جاسالعان كەلىسىمشارتقا نازار اۋدارىلدى. ەكەۋارا جاسالعان قۇجات نەگىزىندە ءبىرىنشىسى قوقىس جينايتىن كاسىپكەرلىككە اي سايىن 257 040 تەڭگە تولەپ وتىرعان. ەكىنشىسى دە مىندەتتەمەگە ساي كوپ قاباتتى ۇيلەردىڭ قوقىس جاشىگىندەگى قالدىقتاردى ۋاقىتىلى الىپ كەتەدى. پيك باسشىلارىنىڭ ايتۋىنشا, وزدەرى بۇل كاسىپكەرلىكتىڭ جۇمىسىنا ريزا, قوقىس جاشىگى ۋاقىتىلى جينالماي قالعان كەزدەر مۇلدەم ورىن الماعان. ۇنەمى تاپ-تازا قىلىپ جينايدى ەكەن. بىراق, «كراۆەتس» جك-ءنىڭ قوقىستى قايدا اپارىپ توگەتىنىنەن بەيحابار بولىپ شىقتى.
– پيك پەن جەكە كاسىپكەرلىك اراسىنداعى كەلىسىمشارتتى قاراپ شىقتىق. بىلاي قاراعاندا, ەكى تاراپ تا ءوز مىندەتتەمەلەرىن ورىنداپ وتىر. بىراق تاعى ءبىر جاي ءبىزدىڭ كوڭىلىمىزدى كۇپتى قىلىپ تۇر. بىزبەن كەلىسىمشارت جاساسقان كاسىپورىندار پوليگون ايماعىنا قوقىس اكەلىپ توككەندە, ونىڭ ءار تونناسى ءۇشىن 2248 تەڭگە تولەۋى كەرەك. «كراۆەتس» جك-ءنىڭ كەلىسىمشارتىن قاراساق, ول پيك-نە ءار توننا قوقىستى 600 تەڭگەگە شىعارۋعا كەلىسكەن. سوندا قالاي؟ كاسىپكەرلىك بىزگە تولەيتىن شىعىندى جاۋىپ, ونىڭ ۇستىنەن ءسال پايدا تابۋى ءۇشىن پيك-پەن كەلىسىمشارت جاساسقاندا, ءار توننا قوقىستى كەمىندە 3500 تەڭگەدەن تاسىمالدايتىنداي بولىپ ۋاعدالاسار ەدى. بىزگە وسى اراسى تۇسىنىكسىز بولىپ تۇر, – دەپ يىعىن كوتەردى بولات احمەتقاليۇلى.
سونىمەن, رەيد بارىسىندا «كراۆەتس» جك-ءنىڭ قوقىستى قايدا توگەتىنى كوميسسيا مۇشەلەرىنە جۇمباق كۇيىندە قالدى. دەگەنمەن, ولار بۇل ماسەلەنىڭ انىق-قانىعىنا بىرەر اپتادا كوز جەتكىزىپ, ءتيىستى شارا قولداناتىندارىن مالىمدەدى.
بۇدان سوڭ رەيدكە قاتىسۋشىلار ل. تولستوي كوشەسىندەگى اۆتوكولىكتەرگە تەحنيكالىق قىزمەت كورسەتەتىن ورتالىقتا جانە №4 اۆتوبۋس پاركى اۋماعىنداعى كوپشىلشىك اسحانادا بولدى. تازالىق ماسەلەسىن اقساتىپ العان بۇل ەكى نىسان قوجايىنىنا ءتيىستى شارا قولدانىلىپ, ايىپپۇل سالىندى.
مەڭدوللا شامۇراتوۆ
