«بايتەرەك» ماڭىنداعى ساۋلەت ءانسامبلى تاعى ءبىر سالتاناتتى عيماراتپەن تولىعادى. 18 ماۋسىمدا استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن دوستىق پەن تۇركىستان كوشەلەرىنىڭ قيىلىسىندا «ۆەرنىي كاپيتال» كومپانيالار توبىنىڭ ينۆەستيتسياسىنا سالىناتىن «Talan Towers» پرەميۋم ساناتتى كەشەنىنىڭ ىرگەتاسىن قالاۋ ءراسىمى ءوتتى.
عيمارات قوس مۇنارالى. بيزنەس-ورتالىق ورنالاساتىن ءبىر مۇنارانىڭ بيىكتىگى 145 مەتر, ال «The Ritz-Carlton Astana» وتەلى ورنالاساتىن ەكىنشى مۇنارانىڭ بيىكتىگى 119 مەتر بولماق. تومەنىندەگى جالپى اۋدانى 5000 شارشى مەتردى الاتىن ءۇش قاباتتى گالەرەيادا ليۋكس دارەجەسىندەگى ءتۇرلى كيىم-كەشەك, اياق كيىم, كەرەك-جاراق بۋتيكتەرى, بانك بولىمشەلەرى ورنالاسپاق. سونىمەن قاتار, وتەلدە 1000-عا جۋىق ادامدى ەركىن سىيدىراتىن لاۋندج-كلۋب, بال-رۋم, SPA, فيتنەس-ورتالىق, سۋ الابى, بىرنەشە مەيمانحانالار مەن بارلار, sky bar, كونفەرەنتس-زالدار بولادى.
«ۆەرنىي كاپيتال» كومپانيالار توبىنىڭ باس ديرەكتورى ەرلان وسپانوۆ:
– قانداي ينۆەستيتسيالىق جوبانى قولعا الساق تا, يندۋستريالىق دامۋدىڭ جاڭا دەڭگەيلەرىن قامتۋ ءۇشىن ەڭ ۇزدىك تاجىريبەنى پايدالانامىز, بۇكىل الەمگە تانىمال, كاسىبي بىلىكتىلىگى جوعارى سەرىكتەستەردى تارتۋعا تىرىسامىز. ءبىزدىڭ ويىمىزشا, بيزنەس مەملەكەتتىڭ «جاسىل ەكونوميكانى» ەنگىزۋ ساياساتىنا قولداۋ ءبىلدىرۋى ءتيىس. «Talan Towers» – وسى ۇدەدەن شىعاتىن ەكو-عيمارات, ياعني LEED ستاندارتىنا ساي. عيماراتتىڭ جوباسىن ساۋلەت, قالا قۇرىلىسى, ينجەنەريا جانە ينتەرەرلىك ديزاين سالاسىنداعى كوشباسشى – SOM (Skidmore, Owings & Merrill LLP) كومپانياسىنىڭ ساۋلەتشىلەرى جاسادى. ارحيتەكتۋرالىق فيرما الەمنىڭ 50 ەلىندە 10 000-عا جۋىق جوبانى جۇزەگە اسىرىپ, 800 ماراپات العان, سونداي-اق, ەكى مارتە «جىلدىڭ ساۋلەت فيرماسى» اتانعان. اسا ايگىلى جوبالارىنىڭ ىشىندە چيكاگوداعى «سيرس تاۋەر» جانە «ترامپ تاۋەر», شانحايداعى «تسزين ماو», دۋبايداعى «بۋردج حاليفا», سونىمەن قاتار, نيۋ-يوركتەگى بۇرىنعى بۇكىلالەمدىك ساۋدا ورتالىعىنىڭ ورنىندا سالىنىپ جاتقان «بوستان مۇناراسى» بار, – دەدى.
«Talan Towers» اتى تەگىننەن-تەگىن تاڭدالىپ الىنباپتى. تالان – باقىت, ساتتىلىكپەن ەگىز ۇعىم. قازاق قۋانىشقا كەنەلسە, «تالانىنا بىتكەن نەسىبە ەكەن» دەيدى, ساتسىزدىككە ۇشىراسا, «تالانى تاستاي ەكەن» دەيدى.
باسى-قاسىندا قازاق بيزنەسمەندەرى تۇرعان مەگا-جوباعا اقجول تىلەگەن استانا قالاسىنىڭ اكىمى يمانعالي تاسماعامبەتوۆ:
– استانادا سوڭعى جىلدارى تۇرعىن ۇيلەرمەن بىرگە, قالانىڭ ءسان-سالتاناتىن كەلتىرەتىن عيماراتتار سالىنۋدا. «حيلتون», «مەريوت», «ابۋ دابي پلازا» قوناق ءۇي كەشەندەرى بوي كوتەرىپ جاتىر. سولاردىڭ قاتارىندا «The Ritz-Carlton Astana» قوناق ءۇيى بار عيماراتقا قارجى تارتىپ, قۇرىلىسىن باستاعان ازاماتتارعا العىس ايتامىز. ەندى ازداعان ۋاقىتتان كەيىن ونىڭ اشىلۋ سالتاناتىنا قاتىسۋعا جازسىن, – دەپ ءسوز سويلەدى.
«ۆەرنىي كاپيتال» الەمگە تانىمال «Ritz-Carlton» برەندىمەن ۇزاقمەرزىمدى سەرىكتەستىك ورناتقان. كومپانيالار توبىنىڭ قارجىلاندىرۋىمەن ونداي وتەل ماسكەۋدە, ۆەنادا اشىلدى, ەندى ەلوردادا بوي كوتەرگەلى وتىر. ول تۋرالى كوپشىلىككە «The Ritz-Carlton, Bvlgary and Edition» كومپانياسىنىڭ ەۋروپا بويىنشا ۆيتسە-پرەزيدەنتى سانديپ ۆاليا جەتكىزدى. كەشەننىڭ قۇرىلىسىن اياقتاۋ 2016 جىلعا جوسپارلانعان.
ادىلبەك جاپاق
