بيىل جازدا ەلوردادا «Eden Life»-تىڭ قارجى پيراميداسىن قۇرۋعا قاتىستى قىلمىستىق ءىس قوزعالعانى كوپكە ءمالىم. ىلە-شالا قارجى مونيتورينگى اگەنتتىگىنىڭ استانا قالالىق دەپارتامەنتى ينۆەستيتسيا سالاسىنداعى ماركەتينگتىك كومپانيا اتىن جامىلعان «MMK Investment» قارجى پيراميداسىن قۇرۋ جانە باسقارۋ بويىنشا سوتقا دەيىنگى تەرگەۋدى باستاسا, كوپ وتپەي باس قالادا قارجى پيراميداسىنان پايدالانىپ, 2 مىڭ ادامدى الداعان الاياق ۇستالدى. ول WhatsApp پەن Telegram مەسسەندجەرلەرىنەن «استانا راۋشان كاسسا اينالىمى» اتتى چات اشىپ, اقشالاي قاراجات الۋ ءۇشىن 2 مىڭ سالىمشىنى تارتقان. ارينە, مۇنداي جاعداي ەلىمىزدە عانا ەمەس, شەتەلدە دە ءجيى كەزدەسەدى. سەبەبى بۇل عالامدىق سيپات العان الدامشىلىقپەن اقشا تابۋ ءتاسىلى بۇكىل الەمدى دىڭكەلەتىپ وتىر.
باتىس ەلدەرىنەن باستالعان بۇل الداپ-ارباۋ جولىمەن اقشا تابۋ ءادىسى ەركىن ساۋدا دەگەندە ەزۋ جيمايتىن اقش-تى دا از سارساڭعا سالعان جوق, ياعني 19-عاسىردىڭ باسىندا بۇل سايقال ساۋدا ءتاسىلىن ويلاپ تاۋىپ, وپىرىپ پايدا تاپقان ەكى ەۆرەي ازاماتى كەيىن تالاي ادامدى تاقىرعا وتىرعىزىپ, باسقا ەلگە قاشىپ كەتتى. ءبىر قىزىعى, تالاي ەلدى قان قاقساتىپ, نەبىر قالتالى بايلاردى تاقىر كەدەيگە اينالدىرعان بۇل ساۋدا ءتاسىلىنىڭ تۇزاعىنا قاراپايىم حالىقتى قويىپ, ويلامى بار وقىمىستىلار دا وماقاستى. وسىدان كەيىن اقش ۇكىمەتى 1979 جىلى «قارجى پيراميداسىنا قارسى تۇرۋ» زاڭىن ماقۇلدادى. وسىدان كەيىن الەمنىڭ كوپتەگەن ەلدەرى قارجى پيراميداسىنا قاتاڭ شەكتەۋ قويعانمەن, بۇگىنگە دەيىن وعان تۇبەگەيلى توسقاۋىل قويا العان جوق.
ەلىمىز دە قارجى پيراميداسىنا شەكتەۋ قويىپ, زاڭدى قاتايتقانمەن, الاياقتار امالىن تاۋىپ, ايلاسىن اسىرۋمەن كەلەدى. الداعى ۋاقىتتا قارجى پيراميداسىن قۇرىپ, حالىقتى سان سوقتىرعانداردىڭ جازاسى 10 جىلدان 12 جىلعا كوبەيتۋ كوزدەلىپ وتىر. الايدا بۇل زاڭ ادام ءولىمى تىركەلگەن جاعدايدا عانا اتقارىلماق. دەمەك, قارجى پيراميداسىنا تۇبەگەيلى توسقاۋىل قويۋ ءۇشىن زاڭدى ءالى دە كۇشەيتۋ كەرەك. دەيتۇرعانمەن مۇنداي الاياقتىقپەن اينالىساتىنداردىڭ كوبى شەتەلدە وتىرىپ جۇمىس جاسايتىندىقتان, ولاردى تەك قانا زاڭعا سۇيەنىپ قۇرىقتاۋ قيىن. ول ءۇشىن حالىقتىڭ قارجى پيراميداسىنا بولعان تۇسىنىگىن ارتتىرىپ, الاياقتاردىڭ الداۋ ءادىسىن جۇرتقا تولىق ءتۇسىندىرۋ كەرەك.
ەڭ اۋەلى, مەيلى قايسى ەلدە, قانداي قالادا ءومىر سۇرسەڭ دە, تەرلەمەي تابار تيىن جوق. ساۋساقتى عانا قيمىلداتىپ اقشا تابۋ, ۇيدە وتىرىپ ءبىر-اق كۇندە ميلليونەرگە اينالۋ دەيتىن ەرتەگىنى ەستەن شىعارۋ كەرەك. ويتكەنى الاياقتاردىڭ امالىمەن اربايتىنى – ءدال وسىنداي ادامدار. ولار كوبىندە پسيحيكالىق جاقتان ءالسىز, قارجىدان قىسىلىپ, تىعىرىققا تىرەلگەن ادامداردى كوزدەيتىنى دە الدەقاشان دالەلدەنگەن اقيقات.
قارجى پيراميداسىنىڭ سيپاتى مەن الدامشىلىق تاسىلىنە كەلسەك, قاتىناسۋشىلارعا قاراجات تاپسىرتۋ قارجى پيراميداسى ۇيىمدارىنىڭ مۇشەلىك تولىمدىعىنا يە بولۋىن تالاپ ەتۋدە, ءسوزسىز, باسىپ وتەتىن ءتارتىبى بولسا, «بەلگىلى رەت ءتارتىپ بويىنشا جىك دارەجەسىن قالىپتاستىرۋ» – ونىڭ قۇرىلىمدىق ەرەكشەلىگى. بۇل ۇيىمداردىڭ كولەمى ۇلكەن نەمەسە كىشى بولسىن, بارلىعىنىڭ پيراميدا ءتارىزدى قۇرىلىمى, ءاربىر ادامنىڭ بەلگىلى دارەجەسى بولادى, قابىلداعان ادام سانىنىڭ ارتۋىنا قاراي دارەجەسى ءوسىپ وتىرادى. تومەندەگىلەر, ءسوزسىز, جوعارى دارەجەلى مۇشەلەرگە بوي ۇسىنادى, تومەندەگىلەر تەك ءوزىن مۇشەلىككە قابىلداعان ادامدى عانا بىلەدى, ۇيىمداستىرۋشىلار پەردە ارتىندا تۇرىپ بارلىق ءىستى مەڭگەرەدى, جينالعان اقشا دا دەر كەزىندە «اتاماننىڭ» قالتاسىنا ءتۇسىپ وتىرادى. ۇيىمعا قاتىسقان ادام تالاپ بويىنشا قول استىنا كوپتەپ مۇشە قابىلداعاندا عانا زور پايداعا كەنەلەتىندىكتەن, بۇل ۇيىمعا قاتىسقاندار جانتالاسىپ مۇشە قابىلداۋمەن بىرگە, ءوزى قابىلداعاندارىنىڭ دا قول استىنا ادام قابىلداۋىن تالاپ ەتەدى. مۇندا ولار قابىلداعان ادام تاپسىرعان اقشادان بەلگىلى ۇلەس اكەلۋمەن بىرگە, ودان تومەنگى مۇشەلەردىڭ تاپسىرعان اقىسىنىڭ دا يگىلىگىن كورەدى. پيراميدانىڭ تومەنگى جاعىنداعىلار جانتالاسىپ مۇشە جينايتىندىعىنىڭ, تۇك تاپپاعاندا جاناشىر جاقىنىن, تۋىس-تۋعانىن الدايتىندىعىنىڭ سىرى, مىنە, وسىندا.
قارجى پيراميداسىنىڭ ەڭ تۇپكى ماقساتى الداپ اقشا تابۋ بولعاندىقتان, وعان قاتىسۋشىلاردىڭ جۇمىسقا بەلسەندى كىرىسۋى ءۇشىن الدىمەن ساباق ءوتىپ, «مي جۋ» باسقىشىنان وتكىزەدى. مەملەكەتتىڭ ۇگىت-ناسيحات ماتەريالدارىن قيۋلاستىرۋدى دا قاعىس قالدىرمايتىن ولار «ساۋدا-ساتتىق ءىلىمى», «تابىسقا جەتۋ ءىلىمى», «قوعامداعى قاتىناس ءىلىمى» قاتارلى بايۋعا جىگەرلەندىرەتىن ساباقتار ارقىلى ءوز ماقساتتارىنىڭ سيپاتىن كولەگەيلەپ, قاتىسۋشىلاردىڭ تەز بايۋعا قۇلشىنۋداي قۇشتارلىعىنان پايدالانىپ, جاقىندارىڭىزدى شىرعالاتىپ, ءوز قولىڭىزبەن ءوزىڭىزدى «باۋىزداتادى». كەيدە ءتىپتى ولار ءمالىم ءبىر ءونىمدى ساتقىزۋ ءادىسىن دە پايدالانادى. بىراق وندا دا ءوز قاتارىنا ادام تارتۋعا مىندەتتىسىڭ. مىنە, وسى قاعيدانى تۇسىنبەگەندەر وڭاي الدانادى.
ءسوز سوڭىندا تاعى دا قاداپ تۇرىپ ايتارىمىز: ەڭبەكسىز, تالاپسىز, تەگىن كەلەر بايلىق جوق. باقىتتىڭ سۋى ماڭدايدىڭ تەرى ەكەنىن ەشقاشان ۇمىتپايىق, اعايىن!
