استانا قالاسى اۋماعىنىڭ سانيتارلىق-ەپيدەميولوگيالىق جاي-كۇيى حالىق قالاۋلىلارىن ەرەكشە تولعاندىرىپ وتىر. بۇعان وسى تاقىرىپتا وتكەن كوپشىلىك تىڭداۋ بارىسىندا انىق كوز جەتكىزدىك.
الدىمەن مەملەكەتتىك سانيتارلىق-ەپيدەميولوگيالىق قاداعالاۋ كوميتەتى استانا قالاسى بويىنشا دەپارتامەنتىنىڭ ديرەكتورى سارحات بەيسەنوۆا ەلوردانىڭ جالپى ەپيدەميولوگيالىق جاي-كۇيى تۋرالى اقپارات بەردى. ونىڭ مالىمدەۋىنشە, جۇقپالى اۋرۋلاردىڭ الدىن الۋعا بايلانىستى قالادا سانيتارلىق-اعارتۋشىلىق جۇمىستار جۇرگىزىلىپ, تەلەديدار جانە راديو بويىنشا سۇحباتتار ۇيىمداستىرىلۋدا. باس شاھارداعى ساۋدا ۇيلەرىندە, كينوتەاترلار مەن بازارلاردا, بانكتەردە جانە باسقا ورىنداردا جۇقپالى اۋرۋلاردان ساقتانۋدىڭ جولدارى جونىندە حابارلامالار ءىلىنىپ, ءتۇسىندىرۋ جۇمىستارى جۇيەلى تۇردە جۇرگىزىلۋدە. وسى وتكىزىلگەن ءىس-شارالاردىڭ ءناتيجەسىندە بۇگىندە استانادا ىشەك-قۇرىلىس, ۆيرۋستىق گەپاتيت اۋرۋلارىمەن ناۋقاستانۋ دەڭگەيى ەداۋىر ازايىپ, تۇرعىندار اراسىندا تۋبەركۋلەزبەن ناۋقاستانۋ 11,5 پايىزعا تومەندەگەن.
اۋدان اكىمدەرىنىڭ اپپاراتتارى دا قاراپ جاتقان جوق. شاراعا قاتىسقان الماتى, ەسىل, سارىارقا اۋداندارى اكىمدەرىنىڭ ورىنباسارلارى ب.بولاتبەكوۆ, ب.احمەتجانوۆ, ر.اكچۋريندەردىڭ سوزىنە سەنسەك, ولار قالانىڭ كوممۋنالدىق قىزمەتتەرىمەن جانە پاتەر يەلەرىنىڭ كووپەراتيۆتەرىمەن بىرلەسىپ, ەلوردانى اباتتاندىرۋ جانە كوگالداندىرۋ, ەلوردا اۋماعىنىڭ سانيتارلىق جاي-كۇيىن جاقسارتۋ بويىنشا ءتيىمدى شارالار ۇيىمداستىرۋدا. بۇل باعىتتا سوڭعى جىلدارى ەلوردادا كوممۋنالدىق جانە ەكولوگيالىق سەنبىلىكتەر وتكىزىلىپ تۇرادى. سونداي-اق, تۇرعىن ءۇيلەردىڭ ىشكى ورامدىق اۋماقتارىن كەشەندى اباتتاندىرۋ بويىنشا جۇمىستار جۇرگىزىلىپ, قالانىڭ شالعاي ايماقتارىن دامىتۋ تۇجىرىمداماسى ىسكە اسىرىلۋدا. استانا قالاسىنىڭ ىشكى ىستەر دەپارتامەنتى ستيحيالى ساۋدا جاساۋدى جويۋ بويىنشا جۇمىستار جۇرگىزۋدە. وسى ماقساتتا ورتالىق ەسكى بازار, ءۋاليحانوۆ, راحيموۆ كوشەلەرى, بوگەنباي باتىر داڭعىلى اۋداندارىندا 4 بەينەكامەرا ورناتىلعان. باسقا دا اتقارىلىپ جاتقان جۇمىستار جەتەرلىك.دەي تۇرعانمەن, بىرقاتار شەشىلمەگەن ماسەلە دە بار ەكەن. ماسەلەن, اباتتاندىرۋ, سانيتارلىق جابدىقتاۋ, جيناۋ جۇمىستارىن ۇيىمداستىرۋ جانە استانا قالاسىنىڭ اۋماعىندا تازالىقتى قامتاماسىز ەتۋ قاعيدالارىنىڭ ساقتالۋىن ءتيىستى دەڭگەيدە باقىلاماۋدىڭ سالدارىنان ىشكى ورامدىق اۋماقتا قوقىستار جينالىپ قالۋدا. سونداي-اق, شاراعا قاتىسۋشىلار كەيبىر ءۇيلەردىڭ اۋماعىنان قاتتى تۇرمىستىق قالدىقتاردى تۇراقتى تۇردە شىعارىپ وتىرماۋ, قوقىس كونتەينەرلەرىنىڭ الاڭدارىن ۋاقىتىلى دەزينفەكتسيالاماۋ سەكىلدى جاعدايلاردىڭ ورىن العانىن ايتتى. ءتىپتى, قالامىزدا يتتەردى سەرۋەندەتەتىن ورىنداردىڭ جوقتىعى, وسىدان جاعىمسىز ەپيزووتيكالىق قارسى جاعداياتتاردىڭ تۋىندايتىنى بەلگىلى بولدى. وسىعان وراي, قابىلدانعان ۇسىنىستاردىڭ ورىندالۋى قالالىق ءماسليحاتتىڭ تۇراقتى كوميسسياسىنىڭ باقىلاۋىنا الىندى. ال, ءماسليحات حاتشىسى س.ەسىلوۆ تۋعان قالامىزدىڭ تازالىعى تەك وزىمىزگە قاجەت ەكەنىن, سوندىقتان وعان جاناشىرلىق تانىتىپ, اينالانى تازا ۇستاۋعا تىرىسۋىمىز كەرەكتىگىن ەسكەرتتى.
گ.وكەشقىزى
