БАС ЖҮЛДЕГЕРЛЕР – ЕЛОРДАЛЫҚ СТУДЕНТТЕР
Жуырда Өскемен қаласында өмірден ерте өткен «Дарын» мемлекеттік жастар сыйлығының лауреаты, режиссер, ақын Рүстем Есдәулет атындағы І республикалық Жастар және студенттер фестивалі өтті.
Астана, Алматы, Қарағанды, Көкшетау, Семей сынды қалалардан бірқатар театр ұжымдары қатысқан фестивальде елордадағы Қазақ ұлттық өнер университетінің «Актер және режиссура» кафедрасының жанынан ашылған «Студенттер зертханасы» ұжымы бас жүлдені иеленді.
Астаналықтар қазылар алқасының назарына И.Сапарбайдың «Сыған серенадасы» спектаклінің желісімен қойылған «Шәмші» музыкалық драмасын ұсынды. Шығарманың қоюшы режиссері осы оқу орнының аға оқытушысы, ҚР еңбек сіңірген қайраткері Сайлау Қамиев болды.
«Ұжымымыз 3-курс студенттерінен құралған. Спектакльге бас-аяғы 18 адам қатысты. Қойылымда 12 ән шырқалды. «Сыған серенадасы» музыкалық драмасы бұдан бұрын бірнеше театрда қойылған. Біз оны басқаша трактовкада беруге тырыстық. Шәмшінің шығармашылығына емес, бас кейіпкердің жандүниесіне үңілдік. Композитордың қуанышы мен күйзелісін, жалпы психологиялық портретіне екпін бердік. Онымен сәтсіз шықпады деп ойлаймын. Шәмшінің рөлін Ерхан Мавленбердиев атты талапкер актер сомдады. Изольданы Аида Жанұзақова алып шықты. Шәмшінің анасының рөлі Жадыра Бектенбаеваға берілді. Осының бәрі болашағынан үлкен үміт күттіреді» дейді Сайлау Қамиев.
Жалпы, халық Сайлау Қамиевті Қ.Қуанышбаев атындағы мемлекеттік академиялық қазақ музыкалық драма театрының актері және «Бәйтерек» тобының әншісі ретінде таниды. Әртістің режиссерлік ізденістері де жаман емес. Кезінде ол кәсіби сахнада қойған «Қыз Жібек», «Қозы Көрпеш-Баян сұлу» мюзиклдеріне өнертанушылар жақсы бағасын берген. Сондай-ақ, қырғыз жазушысы, драматург Мар Байджиевтің «Жекпе-жек» спектаклін сахналады.
Аманғали ҚАЛЖАНОВ