Ең ескі аурухана қайта жөнделеді
Астананың орталық теміржол ауруханасы 2018 жылы әкімдіктің коммуналдық меншігіне өтті. Бұл – қаладағы ең ескі медициналық ұйым. Оның қабырғасы 59 жыл бұрын қаланған.
Ауруханада 600-ден аса қызметкер жұмыс істейді, оның 100-ден астамы – дәрігер. Олар Сарыарқа мен Байқоңыр ауданының 400 мың тұрғынына қызмет көрсетеді.
Аурухана Астана әкімдігінің коммуналдық меншігіне өтісімен, елорда әкімі Әсет Исекешев жабдықтарды жаңартуды тапсырды. Бүгінде ауруханадағы жабдықтардың 70 пайызының тозығы жеткен.
– Қайта жөндеу процесі бірнеше кезеңмен жүргізіледі. Біріншісі – әкімшілік және терапиялық корпусты көшіруге дайындау. Гинекологиялық корпус пен Жеңіс даңғылы, 81 мекенжайындағы жеті қабаттық ғимараттың төрт қабатына жөндеу жасалады. Бұл ғимараттың жөндеуіне смета бар, жақын арада әкімдік 380 миллион теңге бөледі. Жөндеуден өткен ғимараттарға көшірілген соң, емхана, әкімшілік және терапиялық корпустар күреледі. Бұл корпустарға жөндеу аяқталып, біз жыл соңына дейін көшеміз деп ойлаймын, – деді аурухананың бас дәрігері Сергей Демочкин.
Бас дәрігердің айтуынша, ауруханаға 2,4 млрд теңгеге жабдық керек.
Айнұр ШОШАЕВА