Астаналықтар автобустардың аялдамаға қаншалықты жақындап қалғанын QR-код арқылы көре алады. Оны аялдамалардағы QR-коды бар арнайы жапсырмалар арқылы анықтап, автобустардың бағыты мен уақыты туралы да біле алады.
«City Transportation Systems» ЖШС қоғамдық көліктерде жүрудің жолақысын электронды төлеу және диспетчерлеу жүйесін жаңғырту аясында аялдамаларды цифрландыру жұмысын бастады.
«Енді аялдамаларда QR-коды бар арнайы жапсырмалар орналастырылады. Оларды сканерлеу арқылы бағдарлардың нақты келу уақытын көруге болады. Ол үшін «Avtobys» мобильді қосымшасын Google Play, App Store немесе App Gallery-дан жүктеп алу қажет. Қолданбаның басты бетінде QR белгісін басып, аялдамадағы QR-кодты сканерлеу керек. Содан кейін қосымшада аялдамадан өтетін маршруттар және олардың болжамды келу уақыты көрсетіледі» деді «City Transportation Systems» ЖШС өкілі.
Қазір елордадағы 225 аялдамада QR-коды бар жапсырмалар бар. Алдағы уақытта қалған аялдамаларға да орнатылады.
