Елорда әкімдігінде кезекті әкім аппарат жиыны өтті. Онда қала басшысының орынбасарлары өздерінің жауапты салалары бойынша қысқаша шолу жасады.
Алдымен шаһар әкімінің бірінші орынбасары Сергей Хорошун қаладағы Тұрғын үй құрылысындағы үлескерлердің мәселелері бойынша сөз алды.
« Өткен аптада осы мәселеге байланысты отырыста 24 нысан қаралды. Сондықтан «Нұрлы жер» бағдарламасы аясында жұмыс жүргізу механизмдерін тұрғын үй құрылыс кооперативтерімен бірлесіп қолға алдық» деді С.Хорошун.
Одан кейін Қосман Айтмұхаметов қаланың төтенше жағдайдың алдын алу, санитарлық-эпидемиологиялық ахуал және жылыту маусымының қалыпты жағдайы туралы баяндады. Әкім орынбасары Ермек Аманшаев денсаулық саласы туралы, оны ішінде дәрі-дәрмектер мен олардың қажетті қоры жайында сөйледі. Малика Бектұрова жанар-жағар май мен көмір нарығы туралы айтты. Ол өз сөзінде бүгінде елордада көмір нарығы тұрақты бақылауда екендігін жеткізді.
Қалалық Ішкі істер департаментінің бастығы Марат Қожаев бас шаһардағы құқықтық тәртіпті қамтамасыз ету бойынша қабылданған шараларға тоқталды. « Астанада құқықтық жағдай орнықты. Өткен аптада 659 қылмыс тіркелді. Бұл өткен жылдың осы кезеңімен салыстырғанда 305 оқиғаға аз» деді ол.
«Бүгін біз 2018-2019 жылдарға арналған елордада қылмыстың алдын алудың кешенді жоспарын қабылдадық. Оның мақсаты – қаладағы қылмыстық ахуалды жақсарту» деді Астана әкімі Әсет Исекешев. Оның айтуынша, кешенді жоспар елорда әкімдігі, ішкі істер департаменті және қалалық прокуратурамен бірлесіп әзірленген.
Соған байланысты елорда басшысы қалалық әкім аппаратына осы жоспардың орындалуын бақылауды тапсырды. «Астана LRT» ЖШС-ның төрағасы Бекмырза Игенбердинов қоғамдық көліктің жағдайына шолу жасады. Қаланы абаттандыру жұмыстары бойынша Алматы, Есіл, Сарыарқа аудандарының әкімдері есеп берді.
