Elordada Qazaqstan halqynyŋ XVIII tılder festivalınıŋ aiasynda el Täuelsızdıgınıŋ 25 jyldyǧyna arnalǧan merekelık şara öttı.
QR Parlamentı Mäjılısınıŋ deputattary, ziialy qauym ökılderı, tıl janaşyrlary jinalǧan şarada memlekettık tıldıŋ nasihaty men damuyna, onyŋ qoldanys aiasynyŋ keŋeiuıne ölşeusız üles qosqan bırqatar adamǧa Astana qalasy äkımınıŋ Alǧys haty tabystaldy.
Astana qalasy Tılderdı damytu basqarmasy ūiymdastyrǧan keşte söz alǧan atalmyş basqarmanyŋ basşysy Tıleuǧali Qyşqaşbaev tılder festivalınıŋ şeŋberınde ötken, alda ötetın şaralarǧa toqtaldy. Onyŋ aituynşa, aldaǧy seisenbı, 27 qyrküiek künı Jastar teatrynda «Otan otbasydan bastalady» atty merekelık keş ötıp, onda osy keştegıdei ana tılımızdıŋ mereiı ösırıledı. Sondai-aq, qazaq tılın jastardyŋ qarym-qatynas tılıne ainaldyru maqsatynda 28 qyrküiekte arnaiy aksiia ūiymdastyrylady.
Astana elımızdıŋ elordasy atanǧaly bas qalada memlekettık tıldıŋ örıs aluyna jauapty basqarmaǧa bırneşe adam jetekşılık ettı. Astanada qazaq tılınıŋ keŋ qanat jaiuyna olardyŋ qosqan eŋbegı az emes. Sondai adamdardyŋ qatarynda halyq aqyny Qonysbai Äbıldıŋ, qoǧam qairatkerı Orazkül Asanǧazynyŋ, Ş.Şaiahmetov atyndaǧy tılderdı damytu jäne üilestıru respublikalyq ortalyǧynyŋ direktory Erbol Tıleşovtıŋ esımderın atauǧa bolady. Keştıŋ saltanatty bölımınde Astana qalasy äkımınıŋ Alǧys haty aldymen osy azamattarǧa tapsyryldy.
Qala basşysynyŋ alǧysyn alǧandardyŋ qatarynan jazuşy, Memlekettık syilyqtyŋ laureaty, qoǧam qairatkerı Aldan Smaiyl, teledramaturg, publisist-jazuşy, QR Tıl komitetınıŋ alǧaşqy töraǧasy, Qazaqstannyŋ eŋbek sıŋırgen qairatkerı, künı keşe ǧana halyqaralyq «Alaş» ädebi syilyǧymen marapattalǧan Sūltan Orazaly, Memlekettık tıl qozǧalysynyŋ töraǧasy, ekonomika ǧylymdarynyŋ doktory Sailau Batyrşaūly, L.N.Gumilev atyndaǧy Euraziia ūlttyq universitetınıŋ prorektory, alaştanuşy ǧalym Dihan Qamzabekūly tabyldy.
Sondai-aq, Astana qalasy Tılderdı damytu basqarmasynyŋ ardager qyzmetkerlerı Svetlana Süleimenova, Qalamqas Qanteeva, Köpbosyn Bekmaǧambet jäne osy basqarmada 10 jyldan berı qyzmet atqaryp kele jatqan Nūrzila Qasqataeva, Qūralai Aqseiıtova, Gauhar Elembaeva, Ainūr Nūrmanova, Talǧat Ermaǧambetov atalmyş marapattyŋ iesı atandy.
Saltanatty şara merekelık konsertke ūlasty.
Amanǧali QALJANOV
