2017 jyldyŋ jazyna qarai, «Egemen Qazaqstan» gazetınıŋ redaksiiasynan zeinetke şyqqanyma jarty jylǧa juyqtaǧan şamada, qalalyq «Astana aqşamy» gazetıne şoluşy qyzmetıne kelıp, bırer aiǧa üzılıp qalǧan jurnalistık jolymdy qaita jalǧastyrdym.
Qazır «Astana aqşamynda» jariialanǧan dünielerımnıŋ özı jiyrma baspa tabaq kölemınde basylyp şyǧatyn kıtapqa laiyq bolyp tūr.
Men gazette qyzmet etken kezde köptegen jaŋa aidarlar qatarǧa qosyldy. Solardyŋ bırqataryn tıkelei men jürgızıp otyrdym. Mäselen, «Ülken qala ürdısı» degen arnauly bet aiasynda älem qalalaryndaǧy eldı mekendı körıktendıru men şaruaşylyq jürgızudegı ärtürlı jaqsy jaŋalyqtar men tälımdı täjıribeler turaly oi tolǧap tūrdyq. «Şahar şejıresı» şeŋberınde köne Aqmola men Selinograd kezınen bar qily nysandar jaily suyrtpaqtap syr şerttık. «Tarihi tūlǧada» osy kent pen ölkeden şyqqan belgılı kısıler turasynda zertteu jürgızdık. Osy syŋaida qazaqtyŋ alǧaşqy jazba aqyn qyzdarynyŋ bırı Şolpan İmanbaeva haqynda qalam terbeu men üşın esten ketpes oqiǧa boldy. Menıŋ gazette saiasi şoluşynyŋ mındetın atqarǧan kezdegı jūmysym da bırazǧa baryp qalypty. Olar apta saiyn derlık «Şartarap» jäne «Körşı aqysy» degen ataularmen üzbei jaryq körıp tūrdy.
Men kelgen kezde de redaksiia ūjymy saidyŋ tasyndai tarlandardan qūralǧan eken. Bas redaktordyŋ orynbasary Ǧalym Qojabek arasynda özı būrqyratyp jazyp tastap tūratynynan bölek, ūjymdy ūiadai etıp ūstap, ärbırın kezektı jerıne yŋǧaiymen jūmsap otyruǧa äbden töselıp qalypty. Jauapty hatşy bolyp jürgen Orynbek Pazylov gazet maketın syzyp tastap, bettı jürgızuden bosaǧannan keiın dereu qalam-qaǧazyna jügınetın besaspap maman retınde körındı. Qalǧan jurnalister jūraǧatynyŋ qai-qaisy bolsa da, aitylyp otyrǧan deŋgeiden tömen tüse qoimaityn «sen tūr, men ataiynnyŋ» sūrpynan bolyp şyqty. Jürdek jurnalister Amanǧali Qaljanov pen Azamat Esenjoldyŋ ekeuı de ruhaniiat sanatynda jürgenımen, jazu mänerlerı men täsılderı bır-bırınen özgeşe, ärbırınıŋ özıne tän qoltaŋbalary bar. Al Güljan Rahmanqyzynyŋ bılım jüiesıne qatysty jazǧan kez kelgen maqalasynyŋ reitingısı ämanda joǧary synap baǧanasynan tabylyp jatatyn. Tez jazyp tastap, kelesı taqyrypqa qinalmai köşe beretın Gülmira Aimaǧanbet özın naǧyz küi taŋdamaityn jorǧa bola alatynyn erte bastan aŋdatyp keledı. Qaşannan «öz ǧasyry özınıŋ iınınde» jüretın, özıne öz düniesın äldeqaşan qalyptastyryp ülgergen Aigül Uäiıstıŋ köterıp jürgen adamgerşılık pen adami qūndylyqtar töŋıregın şiyrlaityn mäselelerı men taqyryptaryna jūrttyŋ bärınıŋ bırdei «tısı bata bermes» edı. Ūjymǧa bızden keiındeu kelgen Tölen Tıleubai eŋısten salsa, töske ozatyn, ne jazsa da, tap-tūinaqtai etıp jaza qoiatyn öte ūqypty da zerek ınılerımızdıŋ bırı esebınde qūrmetımızge bölendı.
İä, özım qyzmet etken jyldary «Astana aqşamynda» şyǧarmaşylyq erkınşılık anyq aŋǧaryldy.
Mıne, öz ömırımızdıŋ säulelı bır sätterı ötken sol «Astana aqşamy» gazetınıŋ jaryqqa şyǧa bastaǧan şaǧyna da otyz jyl merzım tolypty. Būl atalmyş basylymnyŋ ordaly otyz jylda elordanyŋ damuyna ürkerdei üles qosyp qana qoimai, sonymen bırge qanşama qabyrǧaly qalamgerdı öz qatarynan ūşyryp şyǧarǧanyna kuä bola tüsedı.
Mereilı mereke qūtty bolsyn!
Serık PIRNAZAR,
Qazaqstannyŋ mädeniet
qairatkerı, baspasöz
ardagerı
