Körme törge şyqqan kez
Törtkül düniege tör körsetken 2017 jyldyŋ 90 künı «EKSPO künderı» bolyp esımızde qaldy. Aişyqty üş aida 5,4 millionǧa juyq adam körmenı tamaşalady. Aldyn ala jobalaǧandai, 100 memleket jäne 10 halyqaralyq ūiym emes, 15 memleketke artyq kelıp, 22 halyqaralyq ūiym qatysty. Älemdık deŋgeidegı şara elımızdıŋ de ömırıne serpılıs berdı. Şaǧyn jäne orta biznestegı 1400-den astam käsıporyn qūny 640 milliard teŋge bolatyn tauarlardy jetkızuge jäne qyzmet körsetuge tapsyrys aldy. Turistık sektor jandana tüstı. Turoperatorlardyŋ qyzmetıne degen sūranys 1,8 ese artty. Astanada käsıpkerlık subektılerınıŋ sany 10 paiyzdan asa köbeidı. Elorda biudjetıne qyzmet körsetu salasynan tüsken salyq 1,2 ese östı. Osylaişa, Qazaqstannyŋ astanasy bükıl älemnıŋ nazaryn özıne audardy.
Qazaqstannyŋ negızgı ırı jobalarynyŋ bırı «EKSPO-2017» halyqaralyq mamandandyrylǧan körmesın Astanada ötkızu Elbasy Nūrsūltan Nazarbaevtyŋ batyl ärı igılıktı bastamasy boldy.
2011 jylǧy 10 mausymda Parijdegı Halyqaralyq körmeler biurosynyŋ Bas hatşysy Visente Gonsales Lossertaleske resmi türde Qazaqstan Respublikasynyŋ ötınımı tapsyryldy. Bır jyl ötken soŋ Parijdegı Halyqaralyq körmeler biurosynyŋ Bas assambleiasynyŋ 151-ınşı otyrysynda Astananyŋ resmi tanystyrylymy bolyp öttı. Jiynnyŋ basynda delegattarǧa Qazaqstan Prezidentınıŋ arnaiy beineündeuı joldandy. Nūrsūltan Nazarbaev öz sözınde Astana jeŋıp şyqqan jaǧdaida, jobanyŋ tabysty jüzege asyryluy üşın barynşa küş-jıgerın jūmsaitynyna kepıldık berdı. 2012 jylǧy 22 qaraşada HKB-ge müşe 161 eldıŋ ökılderınıŋ jasyryn dauys beru barysynda Astana jeŋıske jetıp, «EKSPO-2017» halyqaralyq mamandandyrylǧan körmesı ötetın oryn retınde taŋdaldy. Astananyŋ ötınımın 103 el qoldady. Qazaqstan «EKSPO-2017» TMD jäne Şyǧys Europa elderı arasynda bırınşı bolyp ötkızıp, tarihqa endı.
– Astanadaǧy EKSPO halyqaralyq körmesı – jahandyq keŋıstıkte elımızdı tanytudyŋ jäne «Qazaqstan» ūlttyq brendın ılgerıletudıŋ jaŋa belesı. Bız «Bolaşaqtyŋ energiiasy» taqyrybyn ūsyna otyryp, ǧylymi progrestıŋ bel ortasynda boludy qalaimyz. Būl – älemnıŋ bızdıŋ elımızdıŋ täuelsızdık jyldaryndaǧy tabystary men qol jetkızgen biıkterın moiyndaǧandyǧynyŋ belgısı. Sondyqtan ol – jalpy elımızdıŋ jarqyn tabysy. Būl – jalǧyz Astananyŋ emes, jalpy Qazaqstannyŋ jeŋısı, – dedı Nūrsūltan Nazarbaev.
«EKSPO-2017» halyqaralyq mamandandyrylǧan körmesı elımızdıŋ bedelın älemdık arenada bekıtkenı sözsız. Täuelsız elımızge degen senım deŋgeiın biıktetıp, memlekettık aşyqtyǧy men alǧa ūmtylǧan asyl mūratyn aişyqtady.
Körme aşylǧan künı elordada bas qosqan Şanhai yntymaqtastyq ūiymy sammitıne qatysuşylary qonaqtardyŋ alǧaşqy legın bastady. Al körme şymyldyǧyn japqan künı İslam yntymaqtastyǧy ūiymynyŋ ǧylym jäne tehnologiialar jönındegı sammitımen tūstas keldı. Osy nysanaly ekı sammit arasynda Düniejüzı qazaqtarynyŋ qūryltaiy öttı, sport saŋlaqtary kökpar tartyp, qazaq paluandary küres şarşysyna küş synasty. Älemnıŋ tükpır-tükpırınen kelgen türlı mädenietterdıŋ ündesken ornyna ainalǧan körmede öner jūldyzdaryna täntı boldyq. Körmenıŋ 90 künınde kün saiyn konsertter, şou, ūlttyq künder jäne özge de oiyn-sauyq ıs-şaralary öttı. Alys-jaqyn elderden kelgen ärtürlı ǧylym salasyndaǧy türlı seminarlar men şeberlık sabaqtary kezdesuler körme künderın mändı ettı. Astana ekonomikalyq forumy, Şetel investorlarynyŋ keŋesı biznes körıgın qyzdyrdy.
«Etnoauyl» boi köterıp, qazaqtyŋ qolönerşılerı tuyndylaryn qonaqtarǧa ūsyndy. «EKSPO-2017» halyqaralyq körmesı ötken uaqytta «Bäiterek» monumentıne 287 myŋ adam kelıp, qūstyŋ ūşar biıgınde tūryp qala körkın tamaşalady.
Aigül UAISOVA