Audan äkımı Erǧali Egemberdı özı bas bolyp, tūrǧyndardyŋ talap tılekterın tyŋdady. Aldymen «Aşyq esık» künın ötkızudıŋ maŋyzyna toqtalǧan audan äkımı atalǧan audanda tūrǧyndarmen kezdesu üzbei ötkızılıp kele jatqanyn jetkızdı.
«Men aqpan aiynan berı är jūma saiyn tūrǧyndardy qabyldap kelemın. Apta saiyn joq degende 20-30 adamnyŋ ötınışın öz qūlaǧymmen estimın. Al bölım meŋgeruşılerı är beisenbı saiyn tūrǧyndardy qabyldaidy. Äleumettık jelı arqyly tüsken şaǧymdar da uaqytynda şeşım tauyp jatyr. Demek, «Aşyq esık» künı bızdı halyqpen tyǧyz bailanystyratyn altyn köpırge ainaldy. Bızdıŋ esıgımız qaşanda sızderge aşyq, qaşan kelseŋızder de sūrauly mäselelerıŋızge jauap aluǧa mümkındık bar», – dedı audan äkımı şaraǧa kelgen tūrǧyndarǧa.
Audan äkımımen «Aşyq esık» künınde kezdesıp, mäselesı oidaǧydai şeşılıp, quanyp şyqqan Tūrsynǧazy Ahmetūly audandaǧy är sala qyzmetkerlerınıŋ jūmysyna dän riza ekenın jetkızdı.
«Būryn äkımge kırıp dat aitpaq tügılı äkımşılıktıŋ esıgınen enudıŋ özı qiyn bolatyn. Al qazır būl tosqauyl joq. Qala äkımınıŋ özı bastap, audan äkımderı qostap, tūrǧyndardy qabyldaǧaly da köp mäsele şeşımın tapty. «Äkım bol, halqyŋa jaqyn bol» degen osy», – deidı ol.
«Aşyq esık» künıne äkımdıktıŋ bılım, kölık, tūrǧyn üi, ışkı ıster basqarmasy t.b. oryndardyŋ ökılderı qatysty. Keibır tūrǧyndar aitqan mäselelerge bailanysty äkım jauapty mekemelerdıŋ qyzmetkerlerıne tıkelei tapsyrma berıp, mäselenı der kezınde şeşudı būiyrdy.
Saryarqa audanynda 370 myŋnan astam tūrǧyn bar. Tūrǧyndardyŋ şaǧymdary men talap-ötınışterın uaqytynda şeşu üşın būl audan qoǧamdaǧy belsendı tūlǧalardan ūiymdasqan City manager-lerdı de ıske qosypty.
«Bız belsendı tūrǧyn retınde Saryarqa audanynyŋ äkımdıgımen bırge jūmys ıstep kele jatqanymyzǧa 3 jyldan asty. Jyl basynan berı osy jerde «City manager» retınde 5 adam jūmys ıstep jatyrmyz. Beseumız osy audannyŋ bes öŋırın bölıp alyp, ärqaisymyz özımızge qarasty aumaqta paida bolǧan mäselelerdı der kezınde soǧan qatysty mekemelerge jetkızıp, tüitkıldı tüiınnıŋ tez şeşıluıne türtkı bolamyz», – dedı City manager-dıŋ müşesı Sairagül Abbasqyzy.
