Keşe Astanaǧa elımızdıŋ är öŋırınen kelgen er azamattar respublikalyq «Äkeler forumyna» qatysty. Bırınşı ret ötkızılıp otyrǧan forum Täuelsızdıktıŋ 25 jyldyǧy aiasyndaǧy «25 paidaly ıs» aksiiasy aiasynda ūiymdastyryldy.
Astana qalasy äkımdıgı men Qazaqstan Respublikasy Prezidentı janyndaǧy Äielder ısterı jäne otbasylyq-demografiialyq saiasat jönındegı ūlttyq komissiia «Äkeler odaǧy» qoǧamdyq bırlestıgımen bırlesıp, bala tärbiesındegı äkenıŋ rölın därıpteudı, otbasy institutyn küşeitudı maqsat tūtqan.
– Halqymyzda «Otan, otbasy, otaǧasy» degen – bır-bırınen ajyramaityn ūǧymdar. Būl şara Memlekettık hatşy, Äielder ısterı jönındegı komissiianyŋ töraǧasy Gülşara Äbdıhalyqovanyŋ tapsyrmasymen ötıp otyr. Qazırgı taŋda Qazaqstandaǧy otbasy saiasatynyŋ basty baǧytynyŋ bırı – er azamattar men äkeler abyroiyn saqtau, ony biıktetu, iaǧni qazaq halqynyŋ «äke – asqar tau, ana – etegındegı būlaq, bala – jaǧasyndaǧy qūraq» dästürın jalǧastyru, – deidı Qazaqstan Respublikasy Prezidentı janyndaǧy Äielder ısterı jäne otbasylyq-demografiialyq saiasat jönındegı ūlttyq komissiia töraǧasynyŋ orynbasary Läzzat Süleimen.
Alǧaşqy forumǧa Parlament deputattary, ortalyq jäne jergılıktı organ basşylary, qoǧam qairatkerlerı, halyqaralyq jäne ükımettık emes ūiymdar men ata-analar qauymdastyǧy qatysty.
– Qazaq «tūiaq – tūlpardy, tūlpar – erdı, er eldı saqtaidy» deidı. Täuelsızdıktıŋ 25 jyldyǧy qarsaŋynda bız tek jaqsy närsenı söz etuımız kerek. Bıraq ündemei qaluǧa bolmaityn ökınıştı jaǧdailar da joq emes. Bügınde elımızde 5,5 million bala bar. Bärınıŋ bırdei äke-şeşesı bar dep aita almaimyz. Tıptı, bar bolǧannyŋ özınde de biık ülgını körsete bermeidı. Respublika boiynşa 370 myŋ bala bügınde aliment almaidy. Balalardyŋ 23 paiyzyna ǧana tūraqty aliment tölenedı. Qalǧan äkeler qaida? Er azamattar äielderge nege qol köteredı, balalardy nege qorlaidy? Sızder tek öz ortaŋyzda ǧana emes, elımızdegı barlyq erlerge ülgı boluǧa mındettısızder, – degen Mäjılıs deputaty Zaǧipa Balieva zaldaǧylardy jetımderdı jebeuge şaqyrdy. Onyŋ aituynşa, Qazaqstanda 8 myŋ bala ata-ana qamqorlyǧyna mūqtaj.
– Joldasym ekeumız üş balaǧa qūşaǧymyzdy aştyq. Taǧy beseuın bauyrymyzǧa tartyp, otbasy ülgısındegı balalar üiın qūrǧymyz keledı, – dedı Zaǧipa Balieva sözın jalǧap.
Alqaly jiynda, sondai-aq, är aimaqtan kelgen ülgılı äkeler diplomdarmen marapattaldy. Solardyŋ bırı – Oral qalasynyŋ tūrǧyny, jalǧyzbasty äke Myrzaǧali Düisembeev bügınde üş balasyn baǧyp-qaǧyp otyr. Ol özınıŋ bır büiregın qiyp, tuǧan qyzynyŋ ömırın aman alyp qalǧan. Forumda Myrzaǧali Düisembeevke saltanatty türde «Äkeler odaǧynyŋ» kuälıgı men marapattau qaǧazy tabystaldy.
Bügınde «Äkeler odaǧyna» 300-dei er azamat müşe eken. «Äkeler odaǧynyŋ» äleumettık jelıdegı paraqşalaryna tırkelıp, ūiymǧa kıruge bolady.
Mädina JAQYP
