Полиэтиленді таста, бүгіннен баста!
Бүкіләлемдік қоршаған ортаны қорғау күніне орай қалалық әкімдіктің қолдауымен Еуразиялық топ (ERG) қазақстандық «Биопакет» компаниясымен бірлесіп, «Бүгіннен баста, полиэтиленді таста» атты экологиялық шара өткізді.
Шара барысында Астандағы «Galmart», «КеңМарт», «Алма» және «SMALL» сынды ірі сауда орталықтарының кассаларында тұтынушыларға әдеттегі полиэтилен пакеттерінің орнына табиғатқа залалсыз 50 мың биопакет тегін таратылды.
– Бір реттік пластикалық бұйымдарға біз шектен тыс әуестеніп кеттік. Өз кезегінде мұның жер шарына залалы орасан. Мәселен, әр минут сайын әлемде
1 миллион пластикалық бөтелке сатылады екен. Адамзат жыл сайын 5 триллион бір реттік полиэтилен пакеттерін қолданады. Біз қолданатын пластик бұйымдардың тең жартысы тек бір рет пайдалануға жарамды болса, пластикалық ыдыстардың үштен бірі жинап, қайта өңдеуге келмейді. Нәтижесінде қала мен елді мекендер маңына тасталып, қоршаған ортаны ластайды. Ал осындай полиэтиленнің ыдырауына 250 жыл керек. Сондықтан жұртшылықты табиғатты қорғаудың осы бағытына ерекше көңіл бөлуге шақырамыз, – дейді «Еуразиялық топ» ЖШС қоршаған ортаны қорғау департаментінің директоры Талғат Төребеков.
Мамандардың айтуынша, биопакет – миллиондаған адамдар шығаратын зиянды пластиктен өзге экологиялық мәселелердің бірден-бір шешімі. Мұндай пакеттерді шығаратын отандық компания айына 35 миллион қапшық, соның ішінде қарапайым қоқысқа арналған биологиялық ыдырайтын қапшықтар мен қаптама орауыштарын өндіреді. Шикізаты Еуропадан әкелінетін қапшық бағасы – 25 теңге.
– Бұл – қарапайым қаптамалар емес, сонымен қатар биологиялық тыңайтқыш пакеттер. Күнделікті қолданыста жүрген полиэтилен қапшықтары мұнай өнімдерінен жасалатын болса, біздің қаптамалар органикалық өнімдерден тұрады. Оның артықшылығы да осында. Өйткені біраз уақыттан кейін ол тыңайтқышқа ыдырайды. Пластиктер түрлі зиянды заттар шығарса,
органикалық қапшықтағы өнімдер бастапқы қалпын сақтай алады. Ал біздің басты мақсатымыз – импортқа тәуелді болмау үшін Қазақстанда шикізат өндірісін құру, – дейді «Биопакет» компаниясының басшысы Батырхан Жұманов.