Рухани жаңару рәуіштері
«Астана» концерт залында елорданың 20 жылдық мерейтойына орай қалалық педагогикалық ұжымдардың көркемөнерпаздар байқауының гала-концерті өтті.
Бұл шара «Рухани жаңғыру» бағдарламасы аясында ұйымдастырылды. Байқаудың мақсаты – ұстаздардың шығармашылық өнерін дамытуды көздеген. Негізі, конкурс жыл басында басталған. Дәлірек айтқанда, ақпан айындағы колледждер арасындағы сайыста Кәсіби-техникалық, Құрылыс, Қоғамдық тамақтану және сервис колледждері үздіктер қатарынан көрінген болатын. Ал наурыз айында байқау бас шаһардағы жалпы орта білім беретін мектептер арасында өтті. Онда елуден астам ұжым бақ сынады. Солардың арасынан қазылар алқасы № 48 мектеп-лицейі мен № 4, 10, 31, 59, 38, 56, 69, 72, 83 орта мектептері және №1, 2,3 музыкалық мектептердің өнерпаз ұжымдарының шығармашылығын жоғары бағалаған. Конкурсқа бас-аяғы 6000 мұғалім қатысқан.
Ал кешегі өткен гала-концертте барлық білім беру ұйымдары өнер көрсетті. Шараның ашылуында Білім басқармасының бастығы Әнуар Жанғозин сөз алып, ұстаздар қауымын айтулы күнмен құттықтап, оларға сәттілік тіледі. Концерт барысында мұғалімдер әуелетіп ән салып, күмбірлетіп күй төкті. Бидің де көрігін қыздырды. Оларға ата-аналар мен оқушылар қауымы ризашылық білдірді.
Сонымен, байқаудың гран-приін №48 мектеп-лицейі жеңіп алды. Бірінші орынды № 59, 37 орта мектебі мен Кәсіптік колледжі иеленді. Екінші орын № 56, 76 және 30 мектепке бұйырды. Үшінші орынды № 72, 78 және 31 мектеп қанағат тұтты. Барлық өнерпаз ұжымдар бағалы сыйлықтармен марапатталды.
Азамат ЕСЕНЖОЛ