Қазақстан мен Ресейдің ХІІІ аймақаралық ынтымақтастығы форумы аясында Астана әкімі Әсет Исекешев РФ Челябі облысының губернаторы Борис Дубровскиймен кездесті.
Аймақтар екі арадағы көлік-логистикалық байланыс әлеуетін кеңейтуге ниетті.
Бұл – Челябі облысы басшысының Қазақстан елордасына жасаған екінші сапары. Сапар Астана мен Челябі облысының арасында жасалған ынтымақтастық жөніндегі бірінші келісімге 15 жылдығымен тұспа-тұс келіп отыр. «Челябі облысы – бізге жақын аймақ. Бүгінде ынтымақтастығымыз дамудың жаңа деңгейіне шықты деп сеніммен айта аламыз. Алдағы уақытта бірлескен жұмыстардың әлеуеті мен көкжиегін айтарлықтай кеңейтетін бірқатар жобалар жүзеге асырылады» деді Әсет Исекешев кездесу барысында.
Басқосуда Астана – Челябі тікелей әуе рейсінің ашылуы сөз болды, ол «ЭКСПО-2017» көрмесі кезінде де, одан кейін де сұранысқа ие болмақ.
