Қазақстан халқы ассамблеясының Астана қалалық өкілдігінің қолдауымен «Біздің отанымыз – Мәңгілік Қазақстан!» атты жас суретшілер байқауы өтті.
Тәуелсіздік мерекесіне орай өткізілген байқауға 40-қа жуық жас қылқалам шебері қатысты. Олар өз туындыларында, әсіресе, тәуелсіздік алғаннан бері бас қаламыздың символына айналған зәулім ғимараттар, көркіне көз тоймайтын әсем табиғаты, жазық дала сынды көріністерді бейнелеген. 6 мен 15 жас аралығындағы сурет салуға құштар жеткіншектер туындыларын гуашь, акварель сынды түрлі бояулармен салған. Ал осы конкурсты ұйымдастырушылардың бірі Нұркен Әбдіғалиұлы мұндай шараның қатысушыларға берер пайдасы мол екенін, жастарды патриоттыққа тәрбиелеуге және таланттарды барынша жан-жақты қолдауға септігін тигізетінін айтады.
Осымен төртінші жыл өткізілген байқау нәтижесінде жүзден жүйрік атанған жеңімпаздарға арнайы дипломдар мен бағалы сыйлықтар табыс етілді. Мәселен, I орынды Аделя Жүнісова, II орынды Наргиз Маратова, III орынды Асқар Тұрашев иеленді. Сондай-ақ барлық қатысушылар сертификаттармен марапатталды. Шара соңы мерекелік ән-шашуға ұласты.
Сабина КӘКІМЖАН
