Назарбаев орталығында бір топ зиялы қауым мен белгілі журналистер жаңа әліпбиге қатысты дөңгелек үстел басында бас қосты. «Жаңа әліпби – жаңғыру жолы» деген тақырыпта өткен жиында қатысушылар латын әліпбиіне оралуға байланысты өз ойларын ортаға салды.
Алқалы жиынның модераторы болған Мемлекеттік тілді дамыту қорының директоры Азат Шауеев жаңа әліпби елімізді дамыған мемлекеттердің қатарына қосатынын айтты. Ал ҚР Мәдениет және спорт министрлігі Тілдерді дамыту және қоғамдық-саяси жұмыс комитеті төрағасының орынбасары Ғалымжан Мелдешов үкімет тарапынан атқарылып жатқан жұмыстарға тоқталды. «Бүгінде мемлекеттік тілді латын графикасына көшіру жөніндегі жұмысшы топ бастаманы жүзеге асыруға кірісіп кетті. Оны Ерболат Досаев басқарады. Латын әліпбиіне көшуге бей-жай қарап отырған ешкім жоқ. Бүкіл мемлекеттік органдар түгел қатысып отыр. Бірақ бұл әзірге жоба, шамамен 14-16 қарашада кезекті отырыс өтіп, жаңа әліпби бойынша ұлттық комиссияның құрамы бекітіледі» деді ол.
Ұлттық комиссияға мемлекеттік орган өкілдері, лауазымды тұлғалар, тіл жанашырлары кіреді. Мемлекеттік тілді дамыту қорының директоры Азат Шауеевтің айтуынша, жиын барысында айтылған пікірлер ескеріліп, комиссия қарауына жолданады. «Алдағы кезең ұсынылған нұсқаға қазақ тілінің табиғаты мен заңдылықтары тұрғысынан, орфографиялық, орфоэпиялық ережелеріне икемділігі жағынан талдау мен талқылау жүргізілетін кезең болмақ» деп сөзін қорытындылады қор директоры.
Гүлдана ТАЛҒАТҚЫЗЫ
