Үздік вайнер анықталды
Астаналық Руслан Айткәрімов «Vine Fest» жас вайнерлер фестивалінің жеңімпазы атанды. Бұл фестиваль Халықаралық студенттер күні өткізілген болатын.
Елордада екінші жыл ұйымдастырылған шараның басты мақсаты – жаңашыл, шығармашыл жастарды қолдау. Бұл жолы байқауға қатысып, бақ сынағандар «Жастар саясаты», «Жастар дегеніміз кімдер?», «Астанаға 20 жыл» тақырыптарына қысқа метражды роликтер түсірді. Ал ақтық сынға жолдама алған 15 бейнероликті Нұрлан Батыров жетекшілік еткен қазылар алқасы бағалады.
Фестивальдің жеңімпазы 350 мың теңгеге ие болды. Ұйымдастырушылар екінші орынға – 250 мың теңге, үшінші орынға 150 мың теңге табыстады. Кеш қонақтары танымал тұлғалармен естелікке түсіп, табысты вайнерлердің қолтаңбасын алды. Сондай-ақ салтанатты рәсімде лотерея ойнатылып, жиналған жұрт отандық эстрада өкілдерінің мерекелік концертін тамашалады.