Астанадан ауылға дейін…
АСТАНА
«Билайн» компаниясының елордадағы тұтынушылары желтоқсанда бір ай бойы автобуста 1 теңге төлеп жүре алады. Ол үшін «Мой Билайн» қосымшасын ұялы телефонға жүктеп алу қажет. Бұл шара қала маңына қатынайтын автобустарға қолданылмайды.
АЛМАТЫ
Сәкен Сейфуллин көшесіндегі тергеу абақтысы жабылды. Өткен ғасырдың 30-жылдарында салынған ғимарат қойылған талаптарға сәйкес келмегенімен қатар, қаланың орталығындағы тұрғындардың өміріне қолайсыздық тудырып келген.
ШЫМКЕНТ
Қаланы жаңа жылдық безендіру шараларына биыл жергілікті бюджеттен 70 млн теңге бөлінеді. Бұл қаражатқа «Арбатта» жаңа жылдық шырша орнатылып, безендіріледі. Сондай-ақ, қала көшелеріне әртүрлі шамдармен жағылған сәулеттік формалар қойылады.
АҚТӨБЕ ОБЛЫСЫ
Ақтөбелік кәсіпкер африкалық жайын өсіруді қолға алды. Ол үшін арнайы цех дайындалған. Жылына 1,5 мың тонна өнім беруге қауқары бар цехта әзірге жайынның аналық түрлері ғана бар.
ЖАМБЫЛ ОБЛЫСЫ
«Жастар жылының» аясында Тұрар Рысқұлов ауданында ерекше жоба жүзеге асырылады. Малсақ 10 жас таңдап алынып, оларға бір отар қой, жайылымдық жер, жем-шөп беріледі. Жас шопандар мемлекеттен алған малды 1-2 жылдан кейін түліктің төлі есебінен қайтарады.
СОЛТҮСТІК ҚАЗАҚСТАН ОБЛЫСЫ
Өңірде қысқы және аңшылық туризмді дамыту қарқын алуда. Бұған себеп, облыс аумағында 110 туристік нысан бар. Өткен жылы солтүстікке Ресей, Қырғызстан, Қытай, Германия, Түркия елдерінен 120 мыңға жуық турист барған.
ТҮРКІСТАН ОБЛЫСЫ
Түркістанда түркі әлемінің орталығы ашылады. Ол жерде күллі түркі дүниесінің ойшылдары мен ағартушыларының, ғалымдарының еңбектері қойылып, ғылыми жетістіктері жұртқа көрсетіледі.
ҚАРАҒАНДЫ ОБЛЫСЫ
Қазыбек би ауданындағы 6 көшенің атауы өзгерді. Жаңа атауларды қолдап, 200-ден аса қарағандылықтар дауыс берген. Бұрынғы Насыпной, Отвальной, Паровозный, Портовской, Пикетный, Пахотный деген көшелер енді Жағалау, Талды, Береке, Саяхат, Самал, Тұмар болып жаңарды.