Қазақстан Президенті Қасым-Жомарт Тоқаевтың алғашқы жұмыс сапары Түркістан қаласынан басталды.
Әуелі Мемлекет басшысы «Әзірет Сұлтан» тарихи-мәдени қорық-музейінің археологиялық және архитектуралық ескерткіштері мен Қожа Ахмет Ясауи кесенесін аралап көрді. Қасым-Жомарт Тоқаев қала жұртшылығымен кездесіп, өзінің ел Президенті ретіндегі алғашқы сапарының Түркістан қаласынан басталуында үлкен мән барын жеткізді.
– Түркістан – мемлекетіміздің алтын бесігі. Елбасының бұл қалаға ерекше мәртебе беру туралы шешімі кездейсоқ емес. Ежелгі Түркістанның жаңғыруы мен жаңаруы даму жолымыздың дұрыстығын көрсетеді. Алдағы жұмыстарым туралы және қоғамды толғандырған мәселелерді шешуге байланысты ойымды дәл осы жерде бөліскім келеді, – деді Қазақстан Президенті.
Мемлекет басшысы Үкіметке бюджетті тек мемлекетіміздің дамуына және қауіпсіздік мақсаттарына орай қайта бейімдеуді, сондай-ақ имидждік іс-шараларға арналған шығындарды азайтуды тапсырды.
– Менің Президент ретіндегі негізгі ұстанымым ең алдымен – сабақтастық. Сабақтастық жоқ жерде тұрақтылық болмайды. Тек дағдарыс, тіпті жанжал, қақтығыс қана болады. Бұл – бүкіл әлемнің дәлелденген тарихи тәжірибесі. Екінші ұстанымым – әділеттілік. Әділеттілік жоқ қоғам ешқашан дамымайды. Тек қана қиыншылық, тауқымет, құлдырау болады. Үшінші ұстанымым – ілгерілеу. Қазақстан бәсекелестікке толы әлемде тек қана алға жылжуды көздейді, – деп мәлімдеді Президент Түркістанда сөйлеген сөзінде.
