«استانا قالاسىنىڭ اكىمى اسەت يسەكەشەۆ ەسىل اۋدانىنداعى بىرقاتار ينفراقۇرىلىمدىق جانە الەۋمەتتىك نىسانداردى ارالادى» دەپ حابارلايدى قالا اكىمىنىڭ رەسمي سايتى.
ءبىرىنشى كەزەكتە ول ات باسىن «پريگورودنىي» تۇرعىن ءۇي الابىنا تىرەدى. تۇرعىن ءۇي الابىنىڭ تۇرعىندارى اكىمگە مەكتەپ, ەمحانا سياقتى الەۋمەتتىك نىسانداردىڭ, ساياباقتار مەن گۇل باقتارى سياقتى دەمالىس ورىندارىنىڭ, تۇراقتارداعى ورىندار مەن باعدارشامداردىڭ جەتكىلىكسىز ەكەنىن ايتتى. وسى ماسەلەلەردىڭ تەز ارادا شەشىمىن تابۋى ءۇشىن اسەت يسەكەشەۆ تابيعي رەسۋرستار جانە تابيعاتتى پايدالانۋدى رەتتەۋ, ساۋلەت جانە قالا قۇرىلىسى مەن جولاۋشىلار كولىگى باسقارمالارىنا, «استانا الەۋمەتتىك كاسىپكەرلىك كورپوراتسياسىنا» بۇرىلۋ الاڭى كەڭ گۇلزارلار قۇرىلىسىنىڭ ناقتى جوسپارىن ازىرلەۋدى تاپسىردى.
بۇدان كەيىن قالا اكىمى ۇركەر تۇرعىن ءۇي الابىنىڭ تۇرعىندارىمەن كەزدەستى. مۇندا جولدار مەن ينجەنەرلىك جەلىلەردىڭ قۇرىلىسىن اياقتاۋعا قاتىستى ماسەلەلەر قارالدى. وسى رەتتە اسەت يسەكەشەۆ مەكتەپ جانىنداعى كوشەلەردى جارىقتاندىرۋ, جىلى ايالدامالاردى ورناتۋ, جاياۋ جۇرگىنشىلەرگە ارنالعان جولدار سالۋدى جەدەلدەتىپ, 2, 3, 4 كەزەكتەگى جۇمىستاردى جىل سوڭىنا دەيىن اياقتاۋدى تاپسىردى.
تۇرعىندار اكىمنەن ەلدى مەكەندە «سەرگەك» بەينەباقىلاۋ جۇيەسى كامەرالارىنىڭ ورناتىلۋىن, جاستارعا ارنالعان اۋلا كلۋبتارىنىڭ جاساقتالۋىن, مەديتسينا جانە ءبىلىم بەرۋ سالاسىندا جۇمىس ىستەيتىن ماماندار ءۇشىن جاتاقحانا سالۋدى سۇرادى.
جاعالاۋ شاعىن اۋدانى تۇرعىندارى قالا باسشىسىنا مەديتسينالىق ورتالىقتىڭ ازدىعى مەن اۆتوكولىك تۇراقتارىنىڭ جەتكىلىكسىزدىگىن جانە باسقا دا ماسەلەلەر توڭىرەگىندە ءوز ويلارىن ايتتى.
