استانادا «يادرولىق قارۋسىز الەم قۇرۋ» حالىقارالىق كونفەرەنتسياسى ءوتىپ جاتىر
جيىن يادرولىق سىناقتارعا قارسى ءىس-قيمىلدىڭ حالىقارالىق كۇنى اياسىندا ۇيىمداستىرىلدى.
تاۋەلسىزدىك سارايىندا الەمنىڭ 52 ەلىنەن كەلگەن قاتىسۋشىلار سەمەي يادرولىق سىناق پوليگونىنىڭ جابىلۋىنا 25 جىل تولۋىنا ارنالعان «يادرولىق قارۋسىز الەم قۇرۋ» حالىقارالىق كونفەرەنتسياسىنا قاتىسۋدا. قر پرەزيدەنتى نۇرسۇلتان نازارباەۆتىڭ قاتىسۋىمەن وتەتىن جيىن يادرولىق سىناقتارعا قارسى ءىس-قيمىلدىڭ حالىقارالىق كۇنى اياسىندا وتۋدە.
فورۋم بارىسىندا «بۇۇ جانە قارۋسىزداندىرۋ ۇدەرىستەرى: كەلەشەگى قانداي؟ «الەم. ءححى عاسىر» مانيفەسى», «يادرولىق تەجەۋدەن باس تارتۋ – حالىقارالىق قاۋىپسىزدىكتىڭ جاڭا سيپاتى», «يادرولىق قارۋدان ازات ايماقتار. ورنىقتى الەمنىڭ گەوگرافياسى», «يادرولىق قارۋسىزدانۋ سالاسىنداعى ازاماتتىق قوعامنىڭ ءرولى» تاقىرىپتارى بويىنشا بىرنەشە سەسسيا وتەدى. كونفەرەنتسيا قاتىسۋشىلارى يادرولىق قارۋدى قولدانۋ, پوليگون قۇرباندارىن ەسكە الۋ, قارۋسىزداندىرۋ ساياساتىن قولداۋ جانە ونى تاراتپاۋدىڭ وزەكتى ماسەلەلەرى تۋرالى وي بولىسپەك.
كونفەرەنتسيانى ۇيىمداستىرۋ كوميتەتىنىڭ باسشىسى, سەنات توراعاسى قاسىم-جومارت توقاەۆتىڭ ايتۋىنشا, سەمەي پوليگونىنىڭ جابىلۋىنا 25 جىل تولۋى جاھاندىق ماڭىزى بار كۇن.
-ەل پرەزيدەنتىنىڭ سەمەي يادرولىق پوليگونىن تولىقتاي جابۋ تۋرالى شەشىمى الەمدىك قارۋسىزدانۋ تاريحىندا العاشقى جانە سوڭعى مىسال بولىپ تابىلادى. مەملەكەت باسشىسىنىڭ «الەم. ءححى عاسىر» مانيفەسىنىڭ نەگىزىندە قارۋسىزدانۋ يدەياسى جاتىر. سەمەي پوليگونىنىڭ جابىلۋىنا 25 جىل تولۋى -جەر بەتىندە ورنىقتى الەم قۇرۋدىڭ ءبىرىنشى كەزەكتە ماڭىزدىلىعى جانە قاۋىپسىزدىك پروبلەمالارىنا جاڭا بىرلەسكەن شەشىمدەر ۇسىنۋ تۋرالى بۇكىل الەم قاۋىمداستىعىنا ويلانۋدىڭ ەڭ وڭتايلى مۇمكىندىگى, – دەپ اتاپ ءوتتى ق.توقاەۆ.
جالپى, كونفەرەنتسياعا بۇۇ باس حاتشىسىنىڭ ورىنباسارى, بۇۇ جەنەۆا ءبولىمىنىڭ باس ديرەكتورى, قارۋسىزداندىرۋ جونىندەگى كونفەرەنتسيانىڭ باس حاتشىسى مايكل ميوللەر, يادرولىق سىناققا جالپىعا بىردەي تىيىم سالۋ تۋرالى شارت ۇيىمى دايارلاۋ كوميسسياسىنىڭ اتقارۋشى حاتشىسى لاسسينا زەربو, پارلامەنتارالىق وداقتىڭ پرەزيدەنتى جانە PNND تەڭ توراعاسى سابەر چاۋدحاري, پانافريكالىق پارلامەنتتىڭ پرەزيدەنتى رودجەر نكودو دانگ, بولگاريانىڭ ۆيتسە-پرەزيدەنتى مارگاريتا پوپوۆا, مارشالل ارالدارى نيتيدجەلىنىڭ (پارلامەنت) توراعاسى كەنەف كەدي, فيدجي پارلامەنتىنىڭ توراعاسى جيكو فاتافەحي, ەۆروپا كوميسسياسىنىڭ بۇرىنعى پرەزيدەنتى جانە يتاليا پرەمەر-ءمينيسترى رومانو پرودي, ءيزرايلدىڭ بۇرىنعى پرەمەر-ءمينيسترى ەحۋد باراك, اۋستريانىڭ بۇرىنعى فەدەرالدىق كانتسلەرى الفرەد گۋزەنباۋەر, پولشانىڭ بۇرىنعى پرەزيدەنتى الەكساندر كۆاسنەۆسكي, موڭعوليانىڭ تۇڭعىش پرەزيدەنتى پۋنسالمااگين وچيربات جانە تاعى باسقا ساياسي تۇلعالار قاتىسۋدا.
شارا سوڭىندا كونفەرەنتسيا قورىتىنلىسى بويىنشا قۇجات قابىلداناتىن بولادى.
