وتكەن سەنبى كۇنى استانا قالاسىنىڭ اكىمى يمانعالي تاسماعامبەتوۆ لوندون وليمپياداسىنىڭ قولا جۇلدەگەرى اتانعان مارينا ۆولنوۆا مەن ونىڭ جاتتىقتىرۋشىسى بەرىك مارجىكپاەۆتى ارنايى قابىلدادى.
-كەشە عانا پرەزيدەنتىمىز ەل ابىرويىن اسقاقتاتقان وليمپيادا جەڭىمپازدارىنا قۇرمەت كورسەتىپ, جىلى لەبىزىن بىلدىرگەن ەدى. ەلباسى تاپسىرماسىنا وراي بۇگىن دە بىزگە سىي-سياپات جاساۋدىڭ مۇمكىندىگى تۋىپ وتىر. مارينا, سەن سىر وڭىرىندە دۇنيەگە كەلگەنىڭمەن, استانا اتىنان جارىس دوداسىنا قاتىسىپ قايتتىڭ. بۇل – ءبىز ءۇشىن ۇلكەن مارتەبە. جالپى, بارلىق مۇمكىندىك جاسالعان ەلورداعا تابان تىرەۋ ەكىنىڭ بىرىنە بۇيىرمايدى. ءوزىن دالەلدەگەندەر عانا شىڭدالۋ مەكتەبىنەن وتەدى. سول ماڭداي تەردىڭ وتەۋى قايتىپ, وليمپيادا تاريحىندا العاش رەت ەنگىزىلگەن قىزدار اراسىنداعى بوكستا ەشكىمنىڭ ەنشىسىنە بۇيىرماعان جەڭىستى ەلىڭە سىيلادىڭ, – دەپ قالا باسشىسى ريزاشىلىعىن ءبىلدىردى.
ەمەن-جارقىن جۇزدەسۋ ساتىندە ي.تاسماعامبەتوۆ مارينا ۆولنوۆاعا پاتەر كىلتىن تابىستادى. ال, جاتتىقتىرۋشىسى بەرىك مارجىكپاەۆ 5 ميلليون تەڭگەنىڭ سەرتيفيكاتىن يەلەندى. بۇل ەكى جىل ۇزبەي دايىندالۋدىڭ ناتيجەسىندە قول جەتكەن جەتىستىك ەدى. نەگىزى, وليمپياداعا قاتىسۋ ءۇشىن ءتورت جىل مەرزىم ىشىندە بارلىق تالاپتاردى بۇلجىتپاي ورىنداۋىڭ شارت. وسى مىندەتتى تياناقتى جۇزەگە اسىرعان كەيبىر جامپوزدار مارينا كورسەتكىشىن قايتالاماق تۇگىلى, جارىس جولىنان شىعىپ قالدى ەمەس پە؟!
–جاس كەزىمىزدە ءبارىمىز سپورتپەن اينالىستىق. اسىلى, سپورت تورىنە شىعۋ وڭاي نارسە ەمەس. سوندىقتان بيىككە كوتەرىلگەن سپورتشىلارعا قامقورلىق كورسەتۋ ەلدى باسقارىپ جۇرگەن ازاماتتاردىڭ مىندەتى دەپ ويلايمىن. سپورتتى جانىنا سەرىك ەتكەن جاستار سىزدەرگە قاراپ بوي تۇزەيدى. جوعارى جەتىستىككە جەتۋگە تالپىنادى. وسىنداي جاقسى ءداستۇردى قالىپتاستىرۋعا ىقپال جاساعان سپورتشىلار ءىسى قۇرمەت تۇتۋعا لايىق. ال جەڭىپ العان قولا مەدالىڭ التىنعا بەرگىسىز,-دەدى ءسوز ورايىندا ي. تاسماعامبەتوۆ.
ءوز كەزەگىندە جەڭىمپازىمىز وليمپياداشىلاردىڭ قۇرمەتىنە ارنالعان سالتاناتتى جيىن مەن مەرەكەلىك كەشتەردىڭ ەلوردادا جوعارى دەڭگەيدە وتكىزىلگەنىن اتاپ ءوتىپ, العىسىن ءبىلدىردى. قازىر ءاربىر ءوڭىر توپ جارعان سپورتشىعا قوشەمەت كورسەتۋدە. مارينا دا تۋعان جەرى اسىعا كۇتىپ وتىرعانىن جەتكىزدى.
استانا قالالىق ىشكى ىستەر دەپارتامەنتى كۇزەت قىزمەتىنىڭ قىزمەتكەرى مارينا ۆولنوۆانىڭ باعىندىرعان بەلەسى – تاريحتا قالار جەتىستىك.
ءامىرحان الماعانبەتوۆ
