2017 جىلى «ەكسپو» كورمەسىن وتكىزۋگە نيەتتى قازاقستان – الەمدىك قوعامداستىققا «بولاشاق ەنەرگياسى» تاقىرىبىن ۇسىنعانى بەلگىلى. تاڭداپ العان تاقىرىپتىڭ ماڭىزىن تاعى ءبىر تالقىلاپ, ونى الەمگە تانىتا ءتۇسۋ ءۇشىن استانادا «بولاشاق ەنەرگياسى. عالامشاردىڭ تۇراقتى دامۋى» اتتى حالىقارالىق سيمپوزيۋم ءوتتى. سيمپوزيۋمعا 160 ەلدىڭ 150-گە جۋىق دەلەگاتتارى قاتىستى.
سيمپوزيۋمنىڭ ماقساتى – عالامشاردىڭ نازارىن قازاقستاننىڭ «ەكسپو-2017» كورمەسىنە تاڭدالعان «بولاشاق ەنەرگياسى» تاقىرىبىنا اۋدارۋ. سونىمەن قاتار, استانانىڭ حالىقارالىق شارالاردى جوعارى دەڭگەيدە وتكىزۋگە دايارلىعىن كورسەتۋ. شەتەلدىك جانە قازاقستاندىق عالىمدار, ساياساتكەرلەر مەن قوعام قايراتكەرلەرى سيمپوزيۋمدا جاھاندىق ماسەلەلەردى ايقىنداپ, كليماتتىڭ وزگەرۋىن, بولاشاقتاعى ەنەرگيا مەن ەكولوگيا قاۋىپسىزدىگىن جانە بالامالى ەنەرگيا كوزدەرىن جەتىلدىرۋ مەن تۇراقتى دامىتۋ جوبالارىنا قارجىلاي قولداۋ كورسەتۋدى تالقىلادى. ايتا كەتەرلىگى, استانا جەڭىسكە جەتكەن جاعدايدا, ەكسپو –2017 كورمە قالاشىعى تولىقتاي بالامالى ەنەرگيا كوزدەرى ارقىلى جۇمىس جاسايتىن بولادى.
«الەم بويىنشا ەنەرگەتيكا سالاسىنداعى كەشەندى ماسەلەنى شەشۋ – ەنەرگەتيكالىق بالانس-تى بالامالى قۋات كوزدەرىمەن تولىقتىرۋعا تىكەلەي بايلانىس-تى» دەيدى عالىمدار. اسىرەسە, ەلىمىزدىڭ گەوگرافيالىق جاعدايى جەل, كۇن جانە سۋ ەنەرگياسىن مولىنان پايدالانۋعا مۇمكىندىك بەرەدى. قازاقستان ساعاتىنا 1 ترلن كۆ ەنەرگيا وندىرۋگە مۇمكىندىگى بار. الايدا, قازىر ىسكە قوسىلعان ءتورت ستانتسيا نەبارى 10 مەگاۆات قانا ەنەرگيا وندىرەدى. بۇل رەتتە الەمدىك قاۋىمداستىققا «ەكسپو»-نى وتكىزۋ ءۇشىن «بولاشاق ەنەرگياسى» تاقىرىبىن ۇسىنعان قازاقستان تەك ەلدە عانا ەمەس الەمدەگى ەڭ وزەكتى, تىپتەن ومىرلىك ماڭىزى بار ماسەلەنى كوتەرىپ وتىر. سيمپوزيۋم بارىسىندا سونداي-اق كليماتتىڭ وزگەرۋى, بولاشاقتاعى ەنەرگيا مەن ەكولوگيا قاۋىپسىزدىگى جانە بالامالى ەنەرگيا كوزدەرىن جەتىلدىرۋ مەن تۇراقتى دامىتۋ جوبالارىن قارجىلاندىرۋ ماسەلەلەرى تالقىعا ءتۇستى.
– ءبىز بالامالى قۋاتتى پايدالانۋ ماسەلەسىن كوتەرىپ وتىرمىز. ونىڭ ىشىندە ناقتىراق ايتساق, كۇن, جەل, ەنەرگەتيكالىق رەسۋرس-تار, تەڭىز, مۇحيت رەسۋرستارى بار. بۇل «بولاشاق ەنەرگياسى» اتتى كورمە اياسىندا استانادا ەڭ وزىق الەمدىك تەحنولوگيالاردى ەنگىزۋگە جانە ەنەرگەتيكالىق ءتيىمدى باعدارلامالاردى ىسكە اسىرۋعا مۇمكىندىك بەرەدى. سوندىقتان, بۇل كورمە بەدەلدى, حالىقارالىق ماڭىزى بار وقيعا بولماقشى. بۇل رەتتە بارلىق مەملەكەتتەر وزدەرىنىڭ جەتىك تەحنولوگيالارىن كورسەتۋگە مۇمكىندىك الادى, – دەدى سيمپوزيۋمدا ءسوز سويلەگەن قر پرەمەر-ءمينيسترىنىڭ ورىنباسارى قايرات كەلىمبەتوۆ.
قازاقستاننىڭ بۇل باستاماسىن ەنەرگەتيكا سالاسىنىڭ الدىڭعى قاتارلى ساراپشىلارى, عالىمدار مەن قوعامدىق جانە مەملەكەتتىك ەمەس ۇيىمدار جەتەكشىلەرى قولداپ وتىر. «ەنەرگيانىڭ ەكولوگيالىق تازا كوزدەرىن پايدالانۋعا كوشسەك, قوماقتى ەكونوميكالىق تابىسقا جەتە الامىز. تەحنولوگيالار ترانسفورماتسيا پروتسەسىندە ماڭىزدى ءرول اتقاردى. ول ءۇشىن ناقتى ساياسي قادامدار جاسالۋ كەرەك» دەدى ءوز سوزىندە حالىقارالىق ەنەرگەتيكا اگەنتتىگىنىڭ باس ساراپشىسى ماركۋس ۆرەيك.
«ەكسپو-2017» كورمەسىن وتكىزۋ قازاقستان ءۇشىن حالىقارالىق دەڭگەيدە العا جىلجۋىندا ۇلكەن قادام بولماق. بۇل شارا كورمە نىساندارى مەن استانانىڭ ينفراقۇرىلىمىن سالۋعا جەكە ينۆەستيتسيانىڭ ەلەۋلى كولەمىن تارتۋعا مۇمكىندىك بەرەدى. ەلوردانىڭ دا, تۇتاس رەسپۋبليكانىڭ دا ەكونوميكالىق جانە ينفراقۇرىلىمدىق دامۋى ءۇشىن قوسىمشا ىنتالاندىرۋ بولادى. استاناداعى جانە ونىڭ ماڭىنداعى شاعىن جانە ورتا بيزنەس, ەڭ الدىمەن قىزمەت كورسەتۋ سالاسى, قوناق ءۇي بيزنەسى مەن ىشكى تۋريزم دامۋعا ەلەۋلى ۇلەس الادى.
مامانداردىڭ ايتۋىنشا, «بولاشاق ەنەرگياسى» تاقىرىبىنا ارنالعان مۇنداي جيىن – سالا ساراپشىلارى مەن جەتەكشى عالىمداردىڭ پىكىرتالاس الاڭىنا اينالىپ, بيزنەس باستامالاردىڭ ومىرگە تۇرتكى بولماق. الىپ كورمەنى وتكىزەتىن مەملەكەت – وسى جىلدىڭ قاراشا ايىندا پاريجدە بەلگىلى بولادى. حالىقارالىق كورمەلەر بيۋروسىنىڭ باس حاتشىسى ۆيسەنتە گونسالەس لوسسەرتالەس: «قازاق ەلىنىڭ «ەكسپو-2017» كورمەسىن وتكىزۋگە مۇمكىندىگى مول دەپ باعالايمىز. بىرىنشىدەن, 5 جىلدان كەيىن استانا قالاسىنىڭ 20 جىلدىعى تويلانادى. كورمەنى وتكىزۋ ءۇشىن مۇنداي العىشارتتىڭ ماڭىزى زور. قازاقستاننىڭ «بولاشاق ەنەرگيا-سى» دەپ ۇسىنعان تاقىرىبى دا – ۇزاققا باعىتتالعان ۇلى ماقساتتى بىلدىرەدى», – دەپ اتاپ ءوتتى.
ەركەجان ساتىمبەك
