«بۋراباي» مەملەكەتتىك ۇلتتىق تابيعي ساياباعىنىڭ قىزمەتى تۋرالى سۇحبات

سۇحبات بارىسىندا نۇرسۇلتان نازارباەۆ تۋريزم سالاسىنىڭ قازىرگى احۋالى تۋرالى اڭگىمەلەپ, بۋراباي كۋرورتتىق ايماعىن ودان ءارى دامىتۋ جونىندەگى ويلارىن ءبولىستى جانە بارشا قازاقستاندىقتاردى ەلىمىزدىڭ تابيعي جاۋھارلارىن ساقتاۋ ىسىنە زور كوڭىل بولۋگە شاقىردى.

مەملەكەت باسشىسى قازاقستاننىڭ تابيعي كورىكتى جەرلەرىنىڭ ىشىندە بۋرابايدىڭ ايرىقشا ورىن الاتىنىنا نازار اۋداردى.
– ەلىمىزدە تۋريزم مەن دەمالىس ءۇشىن ءتۇرلى باعىتتار كوپتەپ سانالادى. الماتىنىڭ ماڭىندا – الاتاۋ تاۋلارى, عاجايىپ كولساي, وڭتۇستىك قازاقستاندا – اقسۋ-جاباعىلى تابيعي قورىعى, رەسپۋبليكانىڭ باتىسىندا – شالقار كولى, كاسپي تەڭىزى, قاراعاندى وبلىسىندا – قارقارالى, پاۆلودار وبلىسىندا – باياناۋىل. ءار ءوڭىردىڭ وزىندىك كورىكتى ورىندارى بار, سولاردىڭ ءبىرى بۋراباي – قازاقستاننىڭ «مارجانى». مۇندا بولعاندا ءان ايتپاۋ, شابىتتانباۋ مۇمكىن ەمەس. بۋرابايدىڭ سۇلۋلىعىن حالقىمىز ەجەلدەن-اق جىرعا قوسقانى بەكەر ەمەس. مىسالى, اقىن ءبىرجان سالدىڭ مىناداي جىر جولدارى بار: «جەر شوقتىعى – كوكشەتاۋ, باۋىرىڭ تولعان باقشا باۋ, توڭىرەگىڭ سەكسەن كول, ءيىسىڭ جۇپار اڭقيدى-اۋ». مەن بۇل وڭىرگە كەلىپ جۇرگەنىمە 25 جىلدان اسسا دا ءالى تامسانامىن. قازىر ءبىزدىڭ باستى ماقساتىمىز – كۋرورتتىق ايماقتى ونىڭ تازالىعى مەن تۇمسا تابيعاتىن ساقتاي وتىرىپ دامىتۋ, تانىمال ەتۋ, – دەدى قازاقستان پرەزيدەنتى.
نۇرسۇلتان نازارباەۆ سونداي-اق تاۋەلسىزدىك جىلدارىندا كۋرورتتىق ايماق ينفراقۇرىلىمىنىڭ ايتارلىقتاي جاقسارعانىنا توقتالا كەلە, قازىرگى كەزدە ۇلتتىق ساياباق پرەزيدەنتتىڭ ءىس باسقارماسىنىڭ قاراۋىندا ەكەنىن اتاپ ءوتتى.
– بۇرىندارى بارلىق اۋىز سۋ جەرگىلىكتى كولدەردەن الىنعان بولاتىن, سوندىقتان ونداعى سۋ دەڭگەيى تومەندەي باستادى. سول سەبەپتى سەرگەەۆ سۋ قويماسىنان سۋ قۇبىرىن جۇرگىزۋ مىندەتى قويىلدى. قازىر كولدەردەن سۋ تارتۋ توقتاتىلىپ, سۋ دەڭگەيى قالپىنا كەلدى. ەكىنشى مىندەت – ءوڭىردىڭ عاجاپ تابيعاتىن لاستاماس ءۇشىن ورتالىقتاندىرىلعان جىلۋ بەرۋمەن قامتاماسىز ەتۋ. وسى ماقساتتا جىلۋ ەلەكتر ورتالىعى سالىنۋدا. ءبىزدىڭ الدىمىزدا تۇرعان ءۇشىنشى مىندەت – سۋ قويمالارى مەن ورمانداردى لاستانۋدان ساقتايتىن تازارتۋ قۇرىلعىلارىن ورناتۋ, – دەدى ەلباسى.
مەملەكەت باسشىسى اتاپ وتكەندەي, كۋرورتتىق ايماق ەلىمىزدىڭ تانىمال تۋريستىك برەندى بولىپ, قازاقستاندىقتار مەن شەتەلدىك قوناقتاردىڭ سۇيىكتى دەمالىس ورنىنا اينالدى.
– بۋراباي قازىردىڭ وزىندە قازاقستاننىڭ رامىزىنە اينالدى. ەلوردانىڭ قاسىندا ورنالاسقاندىقتان, جاقسى اۆتوماگيسترال بار بولعاندىقتان, سوڭعى ۋاقىتتا تۋريستەر سانى ارتۋدا. جىل بويعى دەمالىس ءۇشىن بارلىق مۇمكىندىكتەر جاسالۋدا. ۆەلوسيپەدپەن جانە جاياۋ سەرۋەن جولدارى اشىلدى, قىستا شانامەن سىرعاناپ, اتقا مىنۋگە, شاڭعى تەبۋگە بولادى. مۇندا ءىرى حالىقارالىق ءىس-شارالار وتكىزۋگە مۇمكىندىكتەر بار. مىسالعا, شەتەلدىك ينۆەستورلار كەڭەسى بولعاندا بۋرابايدا بارشا الەمنىڭ جەتەكشى بيزنەسمەندەرى باس قوستى. بۇل جەردە تمد, ەاەو سامميتتەرى ءوتتى. ولارعا قاتىسقان مەملەكەتتەردىڭ باسشىلارى مەن ۇكىمەت مۇشەلەرى سول ءىس-شارالار تۋرالى ىلتيپاتپەن ەسكە الادى. ارينە, ەكسپو-2017 حالىقارالىق كورمەسىنە كەلگەن قوناقتار ءۇشىن دە بۋرابايعا دەيىن باعىت ۇيىمداستىرىلاتىن بولادى. كۋرورتتىق ايماق كوپتەگەن تۋريستەردى تارتادى, باستىسى – ولار ءۇشىن بارلىق قاجەتتى جاعدايلاردى جاساۋ كەرەك. ينفراقۇرىلىمى دامىعان سايىن بۋرابايدىڭ اتاعى الەمگە تانىلا بەرەتىن بولادى. بيزنەسمەندەردىڭ نازارىن وسىنداي جاعدايلار تۋعىزۋعا جانە دەمالىس ءۇشىن زاماناۋي جاقسى كەشەندەر سالۋعا اۋدارعىم كەلەدى, – دەدى نۇرسۇلتان نازارباەۆ.
سوڭىندا قازاقستان پرەزيدەنتى بۋراباي ۇلتتىق ساياباعىنىڭ دامۋى كوپ جاعدايدا ءبىزدىڭ ەلوردامىزبەن بايلانىستى ەكەنىنە نازار اۋداردى.
– قازىر استانا ماڭىندا ۇلكەن اگلومەراتسيا قالىپتاسىپ كەلەدى. ءىس جۇزىندە, ەلوردا مەن كۋرورتتىق ايماق اراسىنداعى قاشىقتىق قىسقارۋدا. بولاشاقتا شاعىن اۆياتسيا ۇشىپ, تىكۇشاق كولىگى داميدى دەپ ويلايمىن. مەن استانانى سالۋ بارىسىندا تابيعات جاعدايى كەلمەيدى دەگەنگە قاراماستان, ونىڭ اينالاسىنا اعاش وتىرعىزۋ مىندەتىن قويدىم. بۇگىندە كورىپ وتىرعانىمىزداي, استانانىڭ ماڭىنا 73 مىڭ گەكتارعا اعاش ەگىلدى, بۇل بۋراباي اۋماعىمەن بىردەي. قازىرگى ۋاقىتتا ەكى ايماقتىڭ ورمان القاپتارىن بىرىكتىرۋ مىندەتى قويىلدى, بۇل جۇمىستىڭ جارتىسى اتقارىلدى. ەلىمىزدىڭ كەز كەلگەن كورىكتى ورىندارىن دامىتۋ ۇلكەن كۇش-جىگەردى تالاپ ەتەدى, تيىسىنشە قاراجات تا قاجەت. دەگەنمەن, تۋريزمگە جۇمسالعان ءار تەڭگە ون ەسە پايدا اكەلەدى. سوندىقتان ەلىمىزدىڭ بارلىق تۋريستىك ورىندارىنا قاجەتتى ينۆەستيتسيالار سالا وتىرىپ, قولايلى جاعدايلار جاساۋ كەرەك, – دەدى قازاقستان پرەزيدەنتى.

akorda.kz