بۇرناعى كۇنى بەيبىتشىلىك پەن كەلىسىم سارايىندا «استانا كەشتەرى» ءىى حالىقارالىق ونەر فەستيۆالى شىمىلدىعىن اشتى. قايىرىمدىلىق جوباسى سيپاتىنداعى ىرگەلى شاراعا بارلىق بيلەت سارايدىڭ كاسساسىنان تەگىن تاراتىلدى.
ۇيىمداستىرۋشىلاردىڭ ماقساتى – حالىقتىڭ ءتۇرلى الەۋمەتتىك توپتارىنا جوعارى دەڭگەيدەگى ونەر شىعارمالارىمەن سۋسىنداۋعا مۇمكىندىك بەرۋ. فەستيۆال «دەگدار» مق قامقورشىلىق كەڭەسىنىڭ ءتورايىمى داريعا نازارباەۆانىڭ باستاماسىمەن وتۋدە. جوبا اياسىندا رەسەي مەن قازاقستاننىڭ تانىمال ورىنداۋشىلارى ونەر كورسەتەتىن ءۇش كونتسەرت بەرىلمەك. العاشقى كۇنى كوپشىلىك «كۆاترو» توبىنىڭ كونتسەرتىن تاماشالادى. ونەرسۇيەر قاۋىم ساحناداعى داريعا نازارباەۆانىڭ ونەرىنە قوشەمەت كورسەتتى.
سالتاناتتى كەش «مادەنيەت» ارناسىندا ونەر كورسەتىپ ءجۇرگەن «رومانس رومانتيكاسى» جوباسىنىڭ تۇراقتى قاتىسۋشىلارى – پەتەربۋرگ رومانسى جۇلدىزدارىنىڭ ونەرىمەن جالعاسىن تاپتى.
بۇگىن – «استانا كەشتەرىنىڭ» سوڭعى كۇنى. استانالىقتار مەن قالا قوناقتارى حالىق ءارتىسى ايمان مۇساحودجاەۆانىڭ, قازاقستاننىڭ ەڭبەك سىڭىرگەن قايراتكەرى تيمۋر ۋرمانچەەۆتىڭ جانە «سوليستەر اكادەمياسى» مەملەكەتتىك كامەرالىق وركەسترىنىڭ كونتسەرتتەرىن تاماشالايدى.
شارانىڭ جۇرگىزۋشىسى – رەسەيدىڭ حالىق ءارتىسى سۆياتوسلاۆ بەلزا كەشتىڭ ءارىن كىرگىزۋدە.
اسحات رايقۇل
