نۇر-سۇلتان قالاسى ءماسليحاتىندا «دەپۋتات كۇنى» اياسىندا «مەملەكەتتىك رامىزدەر تۋرالى» زاڭىنىڭ تالاپتارى ورىندالۋى تالقىلاندى. جيىندا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ مەملەكەتتىك رامىزدەردى زەردەلەۋ, ناسيحاتتاۋ جانە قولدانۋ سالاسىنداعى مەملەكەتتىك ساياساتتى ىسكە اسىرۋ, قازاقستاندىق پاتريوتيزم مەن ەلدىڭ تاريحى مەن مادەنيەتىنە قۇرمەتپەن قاراۋدى قالىپتاستىرۋ باعىتىندا اتقارىلعان جۇمىستاردى باياندادى.
مەملەكەتتىك رامىزدەردىڭ 30 جىلدىعىنا وراي قالالىق جانە رەسپۋبليكالىق دەڭگەيدە وتكىزىلەتىن ارنايى ءىس-شارالار جوسپارى بەكىتىلگەنىن ايتىپ وتكەن بايانداماشى ءتيىستى جۇمىستار سول جوسپارعا سايكەس جۇرگىزىلىپ جاتقانىن جەتكىزدى. ودان سوڭ مامىر ايىندا وتكىزىلگەن, الدا وتەتىن شارالارعا توقتالدى.
ونىڭ ايتۋىنشا, مەملەكەتتىك تۋدى كوتەرۋ ءراسىمى, ءبىر مەزگىلدە ءانۇراندى ورىنداۋ, كونفەرەنتسيا, سەمينار, مەرەكەلىك كونتسەرت, اۆتو-موتو شەرۋ, ءتۇرلى تانىمدىق سايىستار, سۋرەتتەر مەن شىعارمالار بايقاۋى سىندى جالپى سانى 200-دەن استام شارا وتكىزۋ جوسپارلانعان.
4 ماۋسىم كۇنى ساعات 10.00-دە «اتامەكەن» الاڭىندا مەملەكەتتىك تۋدى كوتەرۋ سالتاناتى بولادى.
سول كۇنى ساعات 11.00-دە «تاۋەلسىزدىك تىرەگى» اتتى اۆتو-موتو شەرۋ وتەتىنىن ايتقان ول وعان 50 جەڭىل اۆتوكولىك پەن 10 موتوتسيكل قاتىساتىنىن جەتكىزدى. مەملەكەتتىك تۋدى الىپ وتەتىن شەرۋ «اتامەكەن» قازاقستان كارتاسىنان باستالىپ, مەملەكەتتىك رامىزدەردىڭ 30 جىلدىعىنا وراي 30 شاقىرىمدى ءجۇرىپ وتەدى. بۇعان قوسا, سول كۇنى ساعات 10.00-دە قالامگەرلەر اللەياسىندا «ءتىل جانە ءرامىز – تاۋەلسىزدىك جارشىسى» اتتى پاتريوتتىق شارا وتەدى. وعان 50 ەرىكتى قاتىسادى.
– مەملەكەتتىك رامىزدەردىڭ 30 جىلدىعىنا وراي قالا كوشەلەرى ارنايى تاقىرىپتىق بەزەندىرىلۋدە. مەملەكەتتىك تۋدى ۇلكەن كوشەلەردىڭ بويىنداعى كوپقاباتتى ۇيلەردىڭ قابىرعالارى مەن بالكوندارىنا ىلەمىز. قالا داڭعىلدارى مەن نەگىزگى كوشەلەردىڭ بيلبوردتارىنا, LED ەكراندار مەن ايالداما پيلوندارىنا جالپى 200-گە جۋىق تاقىرىپتىق قۇتتىقتاۋلار, قاناتتى سوزدەر ورنالاستىرىلدى.
مەملەكەتتىك رامىزدەردىڭ قولدانىلۋىن تەكسەرۋ ماقساتىندا ءبىلىم مەكەمەلەرىندە رەيدتەر ءوتىپ جاتقانىن ايتقان باسقارما باسشىسى وسىنداي رەيدتەر جىل سوڭىنا دەيىن باسقا دا مەكەمەلەردە جالعاساتىنىن جەتكىزدى. جالپى مەملەكەتتىك رامىزدەر مەرەيتويىنا ارنالعان شارالار 4 ماۋسىممەن عانا شەكتەلمەي, جىل سوڭىنا دەيىن جۇرەتىنىن ايتتى.
قالالىق ءماسليحات دەپۋتاتى ەرلان داكەنوۆ الدا وتەتىن شارالار تۋرالى حالىقتى قۇلاقتاندىرۋ كەرەكتىگىن ايتىپ, 4 ماۋسىم كۇنى مادەنيەت جانە سپورت مينيسترلىگى ەلوردالىق فيلارمونيادا پاتريوتتىق فورۋم وتكىزەتىنىن جەتكىزدى. ءماسليحات دەپۋتاتتارى لاززات رازبەكوۆا-تولەۋحانوۆا, نۇرداۋلەت ورازحانوۆ بايانداماشىعا تاقىرىپقا سايكەس سۇراقتار قويدى.
قالالىق ءماسليحات حاتشىسى ەرلان كاناليموۆ, جيىندى قورىتىندىلاي كەلە, بىرنەشە ۇسىنىس ايتتى. سونىڭ ىشىندە مەملەكەتتىك رامىزدەرگە قاتىستى مەملەكەتتىك ورگانداردىڭ جۇيەلى ۆەدومستۆوارالىق باعدارلاماسى بولۋى كەرەكتىگىن اتاپ ءوتتى.
– مەملەكەتتىك رامىزدەر – مەملەكەتتىگىمىزدىڭ, تاۋەلسىزدىگىمىزدىڭ نىشانى. ونى قادىرلەۋ, قۇرمەتتەۋ, قاستەرلەۋ جانە ارقاشان دا بيىك ۇستاۋ – پاتريوتتىق سەزىمنىڭ ەڭ باستى ۇلگىسى. اسىرەسە بالاباقشالار مەن مەكتەپتەرگە كوڭىل ءبولۋ كەرەك. بۇل سالاعا بۇكىل مەملەكەتتىك ورگاندار ءوز ۇلەسىن قوسۋ قاجەت. رامىزدەردىڭ 30 جىلدىق مەرەيتويىمەن نەمەسە 4 ماۋسىم كۇنىمەن عانا شەكتەلمەي, ءتيىستى شارالاردى تۇراقتى تۇردە وتكىزۋ كەرەك. رامىزدەردى قاستەرلەۋ – بارشامىزدىڭ پارىزىمىز, – دەگەن ەرلان كاناليموۆ رامىزدەردى قۇرمەتتەۋ مەن ناسيحاتتاۋدىڭ الەمدىك ۇلگىسىن, سونىڭ ىشىندە اقش پەن بىرىككەن اراب امىرلىكتەرىنىڭ تاجىريبەسىن اتاپ ءوتتى. ءباا-دە اۋەجايدان جولاۋشىلاردى تۋمەن قارسى الاتىنىن تىلگە تيەك ەتتى.
