بيىلعى 22-25 مامىردا استانا قالاسىندا «KADEX -2014» اسكەري-تەحنيكالىق مۇلىكتەر مەن قارۋلاردىڭ حالىقارالىق ءۇشىنشى كورمەسى وتەدى.
«KADEX-2014» اسكەري-تەحنيكالىق مۇلىكتەر مەن قارۋلار كورمەسى قورعانىس ونەركاسىبى سالاسىنداعى سوڭعى جەتىستىكتەردى كورسەتىپ, مامانداردىڭ پىكىر الماسۋلارىمەن جالعاسادى.
وسىنىڭ الدىندا وتكەن ەكى حالىقارالىق كورمە وتاندىق ونىمدەرگە شەتەلدىكتەردىڭ قىزىعۋشىلىعى وسە تۇسكەنىن كورسەتكەن ەدى.
الداعى كورمەنىڭ باستى ەرەكشەلىكتەرىنىڭ ءبىرى – ارناۋلى سەكتسيالارى بارىنشا كەڭەيتىلگەن ءارى عارىشتىق-اۋە تەحنولوگيالارىن, ۇۇا جانە اۆياتسيالىق قارۋلاردى, اشق جۇيەلەرى مەن جابدىقتارىن, اسكەري سالاداعى روبوت-تەحنيكانى, IT-تەحنولوگيانى, اسكەري-تەڭىز كۇشتەرى مەن قۇرلىقتاعى اسكەرلەردىڭ قارۋ-جاراقتارىن, اسكەردى تەحنيكالىق جانە تىلدا قامتاماسىز ەتۋ, بايلانىس جۇيەلەرى مەن جابدىقتارىن قامتيدى.
ىسكەرلىك جانە تانىستىرۋشىلىق سيپاتتا وتەتىن «KADEX-2014» كورمەسىنە قاتىسۋشىلار جەتەكشى وتاندىق جانە شەتەلدىك ءوندىرۋشىلەردىڭ يننوۆاتسيالىق ىزدەنىستەرىمەن تولىق كولەمدە تانىسا الادى.
قازىرگى كەزدە كورمەنى ۇيىمداستىرۋشى كومپانيانىڭ اتىنا الەمنىڭ 23 ەلىنەن 225 ءوتىنىش كەلىپ ءتۇستى.
الدىن الا بەلگىلەنگەن كورمە الاڭىنىڭ جالپى كولەمى 5000 استام شارشى مەترگە جەتەدى.
