استانا قالاسى قوعامدىق كەڭەسىنىڭ وتىرىسىندا بىرقاتار ماسەلەلەر قارالدى. نەگىزگى ماسەلە – شاھاردا قوعامدىق قاۋىپسىزدىكتى قامتاماسىز ەتۋ جۇمىسى جايىندا قالالىق پوليتسيا دەپارتامەنتى باستىعىنىڭ ورىنباسارى عوسمان جاكين بايانداما جاسادى.
بايانداماشى ەلوردانىڭ الماتى اۋدانى اۋماعىندا «قازاقستان پوليتسياسىنىڭ سەرۆيستىك مودەلى» قاناتقاقتى جوباسى ىسكە قوسىلعانىن اتاپ ءوتتى. ونىڭ ماقساتى – ازاماتتارعا پوليتسيا تاراپىنان ساپالى قىزمەت كورسەتۋ, قاۋىپسىزدىك ماسەلەلەرىن قوعاممەن بىرىگىپ شەشۋ.
– جوبا ىسكە قوسىلعان ۋاقىتتان ۋچاسكەلىك ينسپەكتورلاردى تۇرعىنداردىڭ تانۋ كورسەتكىشى 3 ەسەگە جۋىق ءوستى. ولاردىڭ جۇمىسى جايلى اقپاراتتىق ماتەريالدار كوبەيدى. قازىر ۋچاسكەلىك ينسپەكتورلار تۇرعىندارمەن جۇمىسقا كوبىرەك ۋاقىت بولەتىن بولدى. بيىل بۇل جوبانى سارىارقا اۋدانى اۋماعىندا ىسكە قوستىق, – دەدى ع.جاكين.
ونىڭ ايتۋىنشا, «پوليتسيانىڭ قادامدىق قولجەتىمدىلىگى» قاعيداسى ەنگىزىلىپ جاتىر. سونىڭ ارقاسىندا پوليتسيا قىزمەتكەرلەرى قوعامدىق ورىنداردا ۇنەمى تابىلادى. Amanat پارتياسىنىڭ باعدارلاماسى اياسىندا مودۋل تيپتەگى پوليتسيانىڭ 10 ستاتسيونارلى بەكەتى ورناتىلدى. ۋچاسكەلىك پۋنكتتەرگە ارنالعان عيماراتتار سانى 27-دەن 42-گە ارتتى. الداعى ءۇش جىلدا ولاردىڭ سانىن ەكى ەسەگە ارتتىرۋ جوسپارلانعان. ۋچاسكەلىك ينسپەكتورلارعا, پاترۋل پوليتسياسى پولكى مەن ارنايى باتالونعا ارنالعان 94 اۆتوكولىك ساتىپ الىندى. 2025 جىلعا دەيىن تاعى 183 اۆتوكولىك ساتىپ الۋ كوزدەلگەن.
– بەينەباقىلاۋ جۇيەسىن جاڭعىرتۋ جانە اشىق پلاتفورماعا ءوتۋ اياسىندا بەينەكامەرالارمەن قامتۋ ايماقتارى بويىنشا ارنايى جوبا ىسكە اسىرىلىپ جاتىر. پوليتسيا دەپارتامەنتىنىڭ جەدەل باسقارۋ ورتالىعىنا قالانىڭ ءارتۇرلى نىساندارىنان 28 مىڭنان استام بەينەكامەرا قوسىلدى. سول ارقىلى قىلمىستار اشىلىپ, قۇقىقبۇزۋشىلىقتار اشكەرە بولۋدا. بيىل دەنساۋلىق ساقتاۋ, ءبىلىم نىساندارىنان, ادامدار كوپ جينالاتىن جەرلەردەن, اۋەجاي مەن تەمىرجول ۆوكزالدارىنان وسى ورتالىققا تاعى 4 مىڭنان اسا بەينەكامەرا قوسىلعان. بالالاردىڭ قاۋىپسىزدىگىن قامتاماسىز ەتۋ جانە كەز كەلگەن قۇقىقبۇزۋشىلىققا قارسى ارەكەت ەتۋ ماقساتىندا 218 ءبىلىم نىسانىنان 5014 بەينەكامەرا مەن 202 «SOS» دابىل باتىرما جەدەل باسقارۋ ورتالىعىنا اقپارات جىبەرەدى, – دەدى دەپارتامەنت باستىعىنىڭ ورىنباسارى.
قوعامدىق كەڭەس مۇشەلەرى پوليتسيا جۇمىسىنا قاتىستى كوپتەگەن ماسەلەلەردى كوتەرىپ, ۇسىنىستارىن جەتكىزدى. سىن دا ايتىلدى. كەڭەس مۇشەسى ساپار احمەتوۆ الماتى اۋدانى اكىمى كەزىندە ءوز تاجىريبەسىمەن ءبولىستى. سونىڭ ىشىندە ءتارتىپ ساقشىلارى مەن پيك-تەرمەن جۇمىس, مەكتەپتەردەگى قاۋىپسىزدىكتى قورعاۋ جايىندا ايتتى.
– پوليتسيا قىزمەتكەرلەرىنىڭ ينتەللەكتۋالدىق دەڭگەيىن كوتەرۋ كەرەك. حالىقپەن جۇمىستى كۇشەيتىپ, ەڭ باستىسى, حالىقتىڭ سەنىمىنە يە بولۋ قاجەت, – دەدى ساپار احمەتوۆ.
جيىندا قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب ۇيگە گاز قوسۋعا الەۋمەتتىك كومەك بەرىلەتىن ساناتتاردى كەڭەيتۋ جوسپارلانىپ وتىرعانىن جەتكىزدى. بۇل ساناتقا جەتىم جانە اتا-انا قامقورلىعىنسىز قالعان بالالار, بالالار ءۇيىنىڭ تۇلەكتەرى, جاس بويىنشا زەينەتكەرلەر, مۇگەدەك ادامدار مەن بالالار, كوپبالالى انالار مەن كوپبالالى وتباسىلار قوسىلماق.
سونداي-اق باسقارما باسشىسى استانا قالاسىنداعى جوعارى وقۋ ورىندارىنداعى كۇندىزگى وقۋعا ازاماتتاردىڭ جەكەلەگەن ساناتتارىنا الەۋمەتتىك كومەك بەرۋگە قاتىستى وزگەرىسپەن تانىستىردى. ونىڭ ايتۋىنشا, بۇدان بۇرىن گرانتتار سۇرانىسقا يە ماماندىقتاردى يگەرۋگە بەرىلەتىن. ەندى گرانتتار ءتيىستى ساناتقا جاتاتىن ابيتۋريەنتتىڭ جانى قالاپ تۇرعان ماماندىعىنا بەرىلمەك.
وتىرىستا قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قالانىڭ ونوماستيكا كوميسسياسى مەن قالالىق ءماسليحات ماقۇلداعان كەيبىر قۇرامداس بولىكتەرگە اتاۋ بەرۋ مەن قايتا اتاۋ جوباسىمەن تانىستىردى.
