استانا قالاسى ءماسليحاتىنىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى بويىنشا تۇراقتى كوميسسياسىنىڭ كەزەكتى وتىرىسىندا الەۋمەتتىك جانە تۇرعىن ءۇي قۇرىلىسى سالالارىنداعى ينۆەستيتسيالىق جوبالاردىڭ جۇزەگە اسىرىلۋى مەن قالاداعى بوۋلينگ ويىنى جولاقتارىنا سالىناتىن سالىق ماسەلەسى قارالدى.
ءبىرىنشى ماسەلە بويىنشا استانا قالاسى قۇرىلىس باسقارماسىنىڭ باسشىسى تالعان رىسپەكوۆ بايانداما جاسادى.
– ەلوردادا سوڭعى ءۇش جىلدا 15 مەكتەپ, 19 بالاباقشا, دەنساۋلىق ساقتاۋ سالاسىندا 10 نىسان پايدالانۋعا بەرىلدى. تۇرعىن ءۇي قۇرىلىسى بويىنشا 312,5 مىڭ شارشى مەتر تۇرعىن ءۇي نەمەسە 5619 پاتەر, ونىڭ ىشىندە 3209 پاتەر ايماقتاردى دامىتۋ باعدارلاماسى نەگىزىندە پايدالانۋعا بەرىلدى, – دەپ باستادى باسقارما باسشىسى دەپۋتاتتاردىڭ نازارىنا ۇسىنعان بايانداماسىن.
جالپى قالالىق قۇرىلىس باسقارماسى كوپ پاتەرلى ۇيلەرگە كوممۋنيكاتسيا جۇيەسىن وتكىزۋ, سونداي-اق ەسىل وزەنى ۋچاسكەلەرىن قايتا جاراقتاندىرۋ بويىنشا بەلگىلەنگەن كەستەگە سايكەس تىڭعىلىقتى جۇمىس اتقارعان. بۇگىنگى تاڭدا باسقارما قالا مەكتەپتەرىندەگى تىعىزدىق پروبلەماسىن ازايتۋعا بايلانىستى جۇمىستار جۇرگىزۋدە. اتاپ ايتقاندا, قالاداعى №32, 37, 16 مەكتەپتەرى جانىنان قوسالقى عيماراتتاردىڭ قۇرىلىستارىن ءجۇرگىزۋدە.
قالادا 500 ورىنعا ارنالعان جاڭا تۋبەركۋلەزگە قارسى ديسپانسەردىڭ قۇرىلىسى قارقىندى جۇرگىزىلۋدە.
بۇگىندە قالا بويىنشا 9 كوپ پاتەرلى تۇرعىن ءۇيدىڭ قۇرىلىسى بوي كوتەرىپ كەلەدى. بۇل ۇيلەردە 2068 پاتەر بولادى. جاڭا ۇيلەر 2016 جىلدىڭ سوڭىنا دەيىن پايدالانۋعا بەرىلەتىنى جوسپارلانىپ وتىر.
وتىرىس بارىسىندا دەپۋتاتتار تاراپىنان 2008-2010 جىلدارعا ارنالعان مەملەكەتتىك تۇرعىن ءۇي باعدارلاماسى بويىنشا سالىنۋعا ءتيىس ۇيلەردىڭ قۇرىلىسى قاشان اياقتالادى دەگەن ساۋال قويىلدى. باسقارما باسشىسى ت.رىسپەكوۆ بۇل باعىتتا تىڭعىلىقتى جۇمىس جۇرگىزىلىپ جاتقانىن, اتاپ ايتقاندا باعدارلاما بويىنشا 310 پاتەردى تاپسىرۋ عانا قالعانىن, بۇل باسپانالار جاقىن ارادا پايدالانۋعا بەرىلەتىنىن جەتكىزدى.
سونىمەن قاتار, باسقارما باسشىسى جاڭادان سالىنىپ جاتقان جالپى ءبىلىم بەرەتىن كاسىپتىك وقۋ ورتالىعىنىڭ قۇرىلىسىنا بولىنگەن قاراجاتتىڭ جارتىسى يگەرىلگەنىن, ال قۇرىلىس جۇمىسى 2017 جىلى اياقتالاتىنىن ءمالىم ەتتى.
كۇن تارتىبىنە قويىلعان ەكىنشى ماسەلە بويىنشا استانا قالاسى كاسىپكەرلەر پالاتاسىنىڭ وكىلى نۇرجان بۋكين دەپۋتاتتار قاراۋىنا قالاداعى بوۋلينگ-كلۋبتاردىڭ ۇجىمدىق ءوتىنىشىن جەتكىزدى. بۇل رەتتە قالاداعى بوۋلينگ ويىندارى جولاقتارىنا سالىناتىن سالىق كولەمىن تومەندەتۋ ماسەلەسى ۇسىنىلعان. وسى ورايدا رەسپۋبليكا بويىنشا استانادا ەڭ كوپ سالىق مولشەرى قويىلىپ وتىرعانى العا تارتىلدى. اتاپ ايتقاندا, ەلورداداعى بوۋلينگتىڭ ءبىر جولاعىنا 72 ايلىق ەسەپتەۋ كورسەتكىشى كولەمىندە سالىق بەلگىلەنگەن ەكەن. استاناداعى بوۋلينگ كلۋبتارىنىڭ وكىلدەرى بۇل جاعدايدا اتالعان كاسىپكەرلىكتى, ياعني بوۋلينگ ويىنىن دامىتۋ قيىنعا سوعاتىنىن ايتادى.
بۇگىنگى تاڭدا استانا قالاسىندا 5 بوۋلينگ كلۋبى تىركەلسە, ونىڭ بىرەۋى جۇمىس ىستەمەي تۇر ەكەن. بۇل كلۋبتاردىڭ بارلىعىن قوسقاندا 28 ويىن جولاعى ىسكە قوسىلعان.
اتالعان ماسەلە توڭىرەگىندە قىزۋ تالقىلاۋ ءوتىپ, ناتيجەسىندە دەپۋتاتتار مەملەكەتتىك كىرىس ورگاندارىنا بوۋلينگ جولاقتارىنا حرونومەتراجدى تەكسەرۋ جۇرگىزۋدى, سودان كەيىن ءتۇپكىلىكتى شەشىم قابىلداۋ جونىندە ۇسىنىس جاسادى. وسىلايشا, بۇل ماسەلە تاعى دا تياناقتالىپ, قايتا قارالاتىن بولدى.
عالىم قوجابەكوۆ
